Jańaózen kásiporyndarynyń qarjy-sharýashylyq qyzmetin taldaý úshin arnaıy jumys toby quryldy
Quramyna 33 maman kirgen topqa QMG basqarma tóraǵasynyń orynbasary Dáýletjan Hasanov jetekshilik etedi.
Keshe QMG basqarma tóraǵasy Maǵzum Myrzaǵalıev Astanada arnaıy top qatysýshylarymen kezdesý ótkizdi.
Olarǵa qalanyń eńbek ujymdarymen kezdesý ótkizý, jumysshylardyń eńbek jaǵdaıymen, satyp alý qyzmetimen jáne kásiporyndar jumysynyń basqa da tustarymen tanysý mindetteri qoıyldy.
Jergilikti kompanııalar qyzmetkerleriniń kelisimshart talaptarynyń buzylǵany jónindegi shaǵymdary, sonyń ishinde Astanada ótken arnaıy komıssııa jumysy kezinde «BerAlı Mańǵystaý Company» kompanııasynyń burynǵy qyzmetkerleri málimdegen shaǵymdar jeke qaralady.
Budan basqa, kásiporyndardyń qyzmet túrlerin satyp alý rásimderinde sybaılas jemqorlyq qaýpin anyqtaý men jolyn kesýge erekshe nazar aýdarylady.
Jumys komıssııasy usynǵan taldaý qorytyndysy boıynsha ekonomıkalyq jáne áleýmettik sıpattaǵy ózekti máselelerdi sheshýge arnalǵan is-qımyl jospary jasaqtalady.
Eske sala keteıik, 10 sáýirde Energetıka mınıstrligi ǵımaratynyń aldyna 70-ke jýyq jańaózendik munaıshy jınaldy.
Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda vedomstvo ǵımaratynyń mańaıynda túnep shyqqan jańaózendik jumysshylardyń talaby boıynsha resmı sheshim ázirlenip jatqanyn aıtty.
Bul máselege pikir bildirgen vıtse-premer Altaı Kólginov zań aıasynda áreket etý qajettigin, «tenderden utylǵan kompanııanyń qaıtadan utyp shyqqanyn talap etý» durys emestigin aıtty.
11 sáýir keshkisin Energetıka mınıstrligi aldyna jınalǵan bir top jańaózendik munaıshylardy polıtsııa ustap áketti.
Keıin narazylyqqa shyqqan munaıshylardyń kóshbasshylary málimdeme jasap, eki jaq kelisimge kelgenin habarlady.
12 sáýirde munaıshylar Jańaózenge qaıtty.
Bir aptadan beri QazMunaıGaz ben munaıshylar ortaq kelisimge kelý úshin máseleni talqylap jatyr.
Keshe QMG basshysy Maǵzum Myrzaǵalıev ekijaqty kelissóz jaıynda pikir bildirdi.
