Jańaózen qalasynda Parlament saılaýy kestege sáıkes ótedi - QR OSK
ASTANA. 11 qańtar. QazAqparat /Marlan Jıembaı/ - Mańǵystaý oblysynyń Jańaózen qalasynda QR Parlamenti Májilisiniń kezekten tys jáne máslıhattardyń kezekti saılaýy kestege sáıkes ótedi.
Bul týraly búgin BAQ ókilderine Ortalyq saılaý komıssııasy tóraǵasynyń orynbasary Vladımır Foos málim etti.
«Ózderińiz kórgendeı, Konstıtýtsııalyq keńes Prezıdent vetosyn eńsere almady. Sondyqtan onyń qaýlysy qabyldanbady dep sanalady. Osyǵan oraı Ortalyq saılaý komıssııasy Jańaózen qalasynda saılaý ótpeıdi degen óz qaýlysynyń kúshin joıady jáne 15 qańtarda saılaý kestege sáıkes ótedi», - dedi ol.
Onyń atap ótýinshe, Jańaózendegi saılaý basqa óńirlerdegiden esh aıyrmashylyǵy bolmaıdy. Degenmen Elbasy jarlyǵymen engizilgen tótenshe jaǵdaı rejiminiń shekteýleri eskeriledi. «Onda oblystyq máslıhatta 7 okrýg, qalalyq máslıhatta 12 okrýg bar jáne saılaýshylar sany 50 myńnan asady», - dedi OSK tóraǵasynyń orynbasary.
