Jańaózen qalasy ákiminiń qyzmettik kóligi aıypturaqqa qoıyldy

JAŃAÓZEN. QazAqparat – Jańaózen ákiminiń maqsatsyz paıdalanylǵan qyzmettik kóligi aıypturaqqa qoıyldy, dep habarlaıdy QazAqparat tilshisi.

«18 qyrkúıek, saǵat 00:30-da Aqtaý qalasy, 7 shaǵyn aýdanda ornalasqan meıramhana janynda Jańaózen qalasynyń ákimdigine tıesili memlekettik nómiri 106 RK Land Sruiser avtokóliginiń turǵandyǵy anyqtaldy. Baqylaý barysynda avtokólik júrgizýshisinde jumystan tys ýaqytta memlekettik avtokólikti paıdalanýǵa beriletin ruqsaty bolmaǵandyǵy anyqtaldy. Osyǵan baılanysty, QR Ákimshilik quqyq buzýshylyq kodeksiniń 612-babyna sáıkes, memlekettik nómerdegi avtokólik aıyppul avtoturaǵyna qoıyldy»,- QR Sybaılas jemqorlyqqa qarsy is - qımyl agenttiginiń MO departamenti baspasóz qyzmetiniń habarlamasynda.

Anyqtalǵan derekke baılanysty tekserý jumystary júrgizilýde.