Jańaózen qalasynda referendým qalaı ótip jatyr
AQTAÝ. KAZINFORM – Shaharda 81 myńnan astam daýys berýshi bar. Tańnan beri 30 myńǵa jýyq turǵyn referendýmǵa qatysyp, tańdaý jasady.
Referendým ýchaskelerine sportshy da, akter de, ánshi de kelip, daýys berýde. Solardyń biri Parıj Paralımpıadasynyń qatysýshysy Seıdov Quralbek te óz tańdaýyn jasady.
– Óz eliniń naǵyz patrıoty mundaı mańyzdy sharadan shet qalmaýlary tıis. Sebebi, halyq tańdaýymen tarazylanatyn bul synda qoǵamnyń pikirine qulaq asyp, tańdaý jasaýǵa múmkindik berildi. Sondyqtan árbirimizdiń daýysymyz mańyzdy, - deıdi «Alǵa» múgedekter sport klýbynyń jetekshisi Quralbek Seıdov.
Quryq aýylynyń turǵyny, 90 jastaǵy geolog ta tańdaýyn jasady. Qazaqstan Respýblıkasy jer qoınaýynyń qurmetti barlaýshysy, Mańǵystaý oblysynyń qurmetti azamaty Tursynǵalı Kóshenov Quryq aýylyndaǵy №145 referendým ýchaskesinde daýys berdi.
– Referendým degen – eldik sharýa. Qasym-Jomart Toqaev prezıdenttikke kelgeli beri elimizde ekinshi ret referendým ótip otyr. Bul – el taǵdyryna qatysty máselede halyqpen aqyldasýdyń, olardyń pikirimen sanasýdyń belgisi dep oılaımyn. Sondyqtan otbasymmen, bala-kelin, nemerelerimmen kelip, tańdaýymyzdy jasadyq, - deıdi ataqty geolog-barlaýshy.
Bostan aýylynyń turǵyndary da referendýmǵa kelip, óz tańdaýyn jasap jatyr. Olardyń arasynda tyl ardageri Alpamysh Jumalıev te bar. Qarııa bıyl 88 jasqa toldy.
– Búgin – el úshin mańyzdy kún. Ár azamat jaýapkershilikti sezinip, eldiń bolashaǵyn aıqyndaıtyn mańyzdy sheshimde beı-jaı qalmaýy tıis. Elimiz tynysh, jurtymyz aman bolsyn, - dedi Alpamysh Jumalıev.
Jalpy Mańǵystaý oblysy boıynsha 435 myńnan astam daýys berýshi bar. Aımaqta 250 referendým ýchaskesi jumys istep jatyr. Qoǵamdyq mańyzdy sharany ótkizýge 1 700 den astam qyzmetker jumyldyrylǵan. 250 ýchaskeniń 238-i halyqpen tikeleı jumys isteıdi. Al 12 jabyq referendým ýchaskesinde aýysym qyzmetkerleri, tergeý ızolıatoryndaǵy tutqyndar, aýrýhanadaǵy naýqastar daýys berýde.
