Jańaózen gaz óńdeý zaýytynyń merdigerleri apta saıyn esep berýge mindetteldi
ASTANA. KAZINFORM — Energetıka mınıstri Erlan Aqkenjenov merdiger uıymdardan Jańaózendegi gaz óńdeý zaýytynyń qurylys qarqynyn birneshe ese arttyrýdy talap etti.
Mınıstrliktiń baspasóz qyzmeti habarlaǵandaı, Mańǵystaý oblysyna jumys sapary barysynda mınıstr jobanyń iske asyrylý barysymen tanysyp, bekitilgen kesteden aıtarlyqtaı keshigýdiń bar ekenin atap ótti.
Kelisimshart boıynsha qurylys merzimi 36 aıdy qurasa, sonyń 29 aıy ótip ketken. Soǵan qaramastan jobanyń jalpy daıyndyǵy shamamen 40 paıyz ǵana. Basqasha aıtqanda, qurylysqa bólingen ýaqyttyń 81 paıyzy paıdalanylǵanymen, naqty oryndalǵan jumystardyń kólemi josparlanǵan kórsetkishterden edáýir tómen.
— Mundaı qurylys qarqyny bizdi qanaǵattandyrmaıdy. Merdigerler jumys kólemin dereý ulǵaıtýy tıis, — dedi Energetıka mınıstri Erlan Aqkenjenov.
Qurylys-montaj jumystarynyń oryndalý deńgeıi nebári 13 paıyzdy quraıdy. Beton jumystary boıynsha da aıtarlyqtaı artta qalý baıqalady: josparlanǵan 58,4 myń tekshe metrdiń ornyna nebári 7,5 myń tekshe metr oryndalǵan.
Tehnologııalyq jabdyqtardy jetkizý isinde de keshigýler tirkeldi. Tapsyrys berilgen 259 pozıtsııanyń tek 98-i ǵana sheteldik óndirýshiler tarapynan jóneltilgen. Osyǵan baılanysty merdigerlerge jabdyqtardy jetkizýdi birneshe ese jedeldetý, sheteldik óndirýshilermen jumysty kúsheıtý jáne Qazaqstan aýmaǵynda modýldik qurastyrý qýattaryn arttyrý tapsyryldy.
— Jańaózen gaz óńdeý zaýyty — elimiz úshin strategııalyq mańyzy bar joba. Tapsyrys berýshi merdigerlerdi júz paıyz avanspen ýaqytyly qamtamasyz etti. Endi qurylys qarqynyn kúsheıtip, zaýytty belgilengen merzimde paıdalanýǵa berý qajet, — dep atap ótti Erlan Aqkenjenov.
Qurylysty jedeldetý úshin qurylys alańyna qosymsha jumys kúshi men arnaıy tehnıka jumyldyrylýy tıis. Qurylystyń eń qyzǵan kezeńinde munda 1200-ge deıin maman eńbek etetin bolady.
Zaýyt iske qosylǵannan keıin jylyna 900 mln tekshe metr gaz óńdeı alady. Joba aıasynda jyl saıyn 743 mln tekshe metr taýarlyq gaz, 217 myń tonna suıytylǵan munaı gazy jáne 122 myń tonna pentan-geksan fraktsııasy óndiriledi.
Energetıka mınıstrligi jobanyń iske asyrylýyn baqylaýdy kúsheıtti. Endi merdiger uıymdar qurylys barysy, oryndalǵan jumystar jáne anyqtalǵan keshigýlerdi joıý jónindegi sharalar týraly apta saıyn jedel esep usynyp otyrady.
Aıta keteıik, Jańaózen gaz óńdeý zaýytyn paıdalanýǵa berý 2027 jylǵa josparlanǵan.
Buǵan deıin Premer-mınıstr Oljas Bektenov Úkimet otyrysynda Qashaǵan, Qarashyǵanaq ken oryndary men Jańaózendegi gaz óńdeý zaýyttarynyń qurylysyn apta saıyn baqylaýǵa alýdy tapsyrǵanyn jazǵanbyz.
