Jańaózen bilim bóliminiń basshysyn Ádep keńesine ne úshin shaqyrdy

AQTAÝ. QazAqparat - Mańǵystaý oblysynda Ádep keńesiniń kezekti otyrysy ótip, onda Jańaózen qalasy bilim bóliminiń basshysy Táttimbet Jumalıevke qatysty tártiptik is qaraldy, dep habarlaıdy QazAqparat.

Jańaózen turǵyny A.Qońyrbaeva Ulttyq sybaılas jemqorlyqqa qarsy kúres bıýrosyna T.Jumalıevti aqsha bopsalady dep, shaǵym túsirgen. Alaıda, is dálelderdiń jetkiliksiz bolýyna baılanysty jabylyp, Ádep keńesiniń qaraýyna berildi.

Qyzmettik tekserý barysynda QR «Memlekettik qyzmet týraly» Zańynyń buzylǵany anyqtaldy. Atap aıtqanda, ol óziniń qyzmettik laýazymyn materıaldyq múddeleri nemese jaqyn týystaryna baılanysty máseleleri sheshý kezinde paıdalanǵan.

Ádep keńesi tártiptik isti qarap, Jańaózen ákimine Jańaózen qalasy bilim bóliminiń basshysy Táttimbet Jumalıevke qatysty tártip jaza qoldaný boıynsha usynys engizdi.

Sheneýniktiń ózi isti onyń qatysýynsyz qaraýdy ótinip, Keńes otyrysyna kelgen joq.