Jańaózen ákimdigi aldyna jınalǵany úshin ustalǵan 17 adamdy polıtsııa bosatty

JAŃAÓZEN. QazAqparat - Jańaózen qalasy ákimdigi ǵımaratynyń aldynda qoǵamdyq tártip buzǵan 17 adam polıtsııa basqarmasyna jetkizildi. Bul týraly Mańǵystaý oblystyq polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

10 mamyr saǵat 12:00 shamasynda Jańaózen qalasy ákimdigi ǵımaratynyń aldynda qoǵamdyq tártipti buzý deregi tirkeldi.

«Quqyq buzýshylarmen prokýratýra jáne ákimdik qyzmetkerleri túsindirý jumysyn júrgizdi. Jınalǵandar eskertýge qaramastan QR ÁQBtK-niń 488-babyn buza otyryp (beıbit jınalystardy uıymdastyrý jáne ótkizý tártibi týraly Qazaqstan zańnamasyn buzý) narazylyq aktsııasyn ótkizetinin málimdedi» delingen baspasóz málimetinde.

Polıtsııa qyzmetkerleri 17 quqyq buzýshyny polıtsııa basqarmasyna jetkizdi.

Olarmen profılaktıkalyq áńgime júrgizilip, úılerine jiberilgen.