Janama aýrýy joq jas patsıentterdiń kópshiligi koronavırýsty aýyr ótkizedi
NUR-SULTAN. QazAqparat – Janama aýrýy joq jas patsıentterdiń kópshiligi koronavırýsty aýyr ótkizedi. Mundaı pikirdi QR Densaýlyq saqtaý mınıstrliginiń bas kardıology Mahabbat Bekbosynova bildirdi, dep habarlaıdy QazAqparat tilshisi.
«Búgin kardıologııadaǵy vaktsınatsııa jaıynda sóz qozǵap otyrmyz. Óıtkeni, koronavırýs ınfektsııasymen aýyryp jazylǵandardyń nemese aýyrǵandardyń arasynda júrek qan-tamyr aýytqýlary óte kóp bolyp otyr. Qazirgi ýaqytta barlyq ortalyqtandyrylǵan zertteýler boıynsha koronavırýs ınfektsııasynyń aýyr formasy damýynyń eń birinshi táýekel faktory – bul júrek qan-tamyr aýrýlary», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Degenmen, bas kardıologtyń aıtýynsha, atalǵan zertteýlerge qaramastan Covid-ınfektsııasynyń ótýin aldyn ala boljaý óte qıyn. Sebebi qazirgi ýaqytta janama aýrýlary joq jas patsıentterdiń arasynda da koronavırýs ınfektsııasynyń aýrý ótýi, ókpe qabynýynyń joǵary bolýy baıqalady.
«Muny ótken jyldyń kóktem jáne jaz aılarynda bizdiń ortalyq Covid-klınıkaǵa aýystyrylýyna baılanysty aıtyp otyrmyn. Sol kezde koronavırýstyń aýyr jáne ortasha formasyna shaldyqqan ári aýrýhanaǵa jatýy tıis patsıentterge kómek kórsetken edik», - dedi Mahabbat Bekbosynova.
