Jańalyq jarshysy «24 KZ» telearnasyna 1 jyl toldy. VIDEO

Osy ýaqyt ishinde «24 KZ» komandasy myńdaǵan materıal ázirlep, árbir jarty saǵat saıyn jańalyqtar toptamasyn kórermenge usyndy. Búginde «24 KZ» jańalyq jarshysy, kópshiliktiń úni bola otyryp, qoǵamda bolyp jatqan oqıǵany jedel ári ýaqytpen úndese jetkizetin aqparat quralyna aınaldy.
1 qyrkúıek - «24 KZ» arnasynyń habar tarata bastaǵan kúni. Osydan 1 jyl buryn otandyq medıa keńistiginiń órisi keńeıip, elimizde buryn bolmaǵan táýlik boıy habar taratatyn telearna kórermenge jol tartty. Bir jyl boıy efırde myńdaǵan jańalyq toptamasy kórsetilip, aqparat legi bir sátke de tolastaǵan joq.
Jedeldik pen naqtylyqqa basymdyq bergen telearnaǵa artylǵan júk aýyr boldy. Biraq kórermen kóńilinen shyǵý úshin shyǵarmashylyq ujym baryn saldy. Tilshiler, júrgizýshiler, operatorlar, vıdeoınjınerler, redaktorlar, prodıýserler men rejısserler sııaqty qyzmetkerler kórermen úshin jumys jasaýda. Kún saıyn arnadan saıasat, ekonomıka, tehnologııa, mádenıet, ınnovatsııa salasyna arnalǵan aqparattyq-tanymdyq baǵdarlamalar legi kórsetiledi.
«Kórermender óz baǵasyn bere jatar. Biraq biz elimizdiń aqparat taratý keńistigin oryndap jatyrmyz. Jyl boıy úzilissiz jańalyqtardy kóre alady», - deıdi «Habar» Agenttigi» AQ basqarma tóraǵasy Aıdos Úkibaev.
Arna tilshileri álemde bolyp jatqan oqıǵalardy mıllıondaǵan kórermenge qaz-qalpynda, boıamasyz jetkizýge tyrysty. Tek aqparat taratyp qana qoımaı, túıitkildi máselelerdiń kúrmeýin sheshýge sep bolǵan problemalyq sıýjetter ázirledi. Tilshilerdiń aralasýymen aýyzsý, jol sııaqty sheshimin tappaı turǵan ózekti máseleniń boıyna qan júgirdi. Búginde arnanyń tehnıkalyq negizi elimizdiń kez kelgen aımaǵynda ótip jatqan qandaı da bir jańalyqty sapaly ári qysqa merzimde jetkizýge múmkindik beredi.
«2014 jyly shetelde arnanyń tilshiler qosyny 10 memlekette ashylady. Al 2015 jyly taǵy 10 memlekette tilshiler qosyny ashylady. Kelesi jyldan bastap elimizdiń kez kelgen óńirinen oqıǵa ornynda tikeleı efırde aqpara tarata alatyn bolady», - dedi «24 KZ» arnasynyń shef-redaktory Arman Seıitmamyt.
Bir jyl ishinde «24 KZ» komandasy kóptegen materıal ázirlep, kórermenge usyndy. Táýlik boıy úzdiksiz habar taratyp, halyqtyń kózi, qulaǵy hám tili bolyp, kórermenniń kóńilinen shyǵý úshin 1 jyl boıy 300-ge jýyq qyzmetker tynymsyz eńbek etti. Nátıjesinde «24 KZ» naqty, senimdi ári jyldam aqparat taratatyn medıa quralǵa aınaldy.