Jańalyq saıttary epıdemııanyń jyldam taralýyna tosqaýyl qoıady
ASTANA. QazAqparat - Onlaın portaldardyń tumaý epıdemııasy týraly jazýy onyń jyldam taralýyna tosqaýyl qoıady. H1N1 tumaýymen aýyrǵandar sany men epıdemııa týraly jańalyqtar sanynyń baılanysyn zerttegen Kanada men Qytaı ǵalymdary osyndaı toqtamǵa kelip otyr.
N+1 saıtynyń habarlaýynsha, zertteýshiler BAQ-taǵy «baıbalamnyń» epıdemııa taralmaýyna oń áser etetini dáleldegen.
Bul zertteýge derekter qytaıdyń 36 mln adam turatyn Shensı provıntsııasynan jınalǵan. Úsh aı ishinde ǵalymdar jańalyqtaǵy epıdemııa týraly habarlamalardy, sondaı-aq aýrýhanaǵa jatqyzylǵan syrqattar týraly málimetterdi jınaǵan.
Bir qyzyǵy epıdemııa týraly aqparattar jıi jarııa etilgen 10 kún ishinde aýrýhanaǵa osy syrqatpen túskender sany eki esege azaıyp ketken.
Ǵalymdar bul qubylysty BAQ-tyń adamdar áreketine áser etetindigimen baılanystyrady.
