Jańalyq eldi mekeninde qýǵyn-súrgin qurbandary eske alyndy
ALMATY. Mamyrdyń 31-i. QazAqparat /Erbol Azanbek/ - Búgin Almaty oblysy Talǵar aýdanyndaǵy Jańalyq eldi mekeninde Saıası qýǵyn - súrgin qurbandaryn eske alý kúnine arnalǵan shara ótti,
dep habarlaıdy QazAqparat.
Stalındik zobalań kezinde, ıaǵnı 1929 jyldan 1953 jylǵa deıin Keńes Odaǵynda 40 mıllıon adam qýǵyn-súrginge ushyraǵan. Bulardyń ishinde 103 myń qazaqstandyq bar. Olardyń 25 myńy atý jazasyna kesilip, baqılyq bolǵan. Osy 25 myń jazyqsyz japa shekken azamattardyń 3 myńy Jańalyq aýylynda jerlengen.
Búgin osy jazyqsyz atylǵan 3 myń jannyń basyna qoıylǵan eskertkishke gúl shoqtary qoıylyp, estelikter aıtyldy. Quran oqylyp, as berildi. «Kinásiz atylyp, osy mańaıdaǵy shuńqyrlarda betteri shala-sharpy jabyla salǵan, sol aıaýly arystarymyzdy arýlap qaıta jerlegenimiz, bastaryna belgi ornatyp, jyl saıyn dál osy kúni eske alyp, táý etýge jınalatynymyzdy babalar aldyndaǵy máńgilik paryzymyz dep bilemin. Saıası-qýǵyn-súrgin qurbandaryn eske alý bizdiń árýaqtar aldyndaǵy qasıetti boryshymyz» deıdi Talǵar aýdanynyń ákimi Talǵat Ómirálıev.
Sharaǵa 200-den astam qýǵyn-súrgin qurbandarynyń urpaqtary, Almaty qalasy men oblysy ákimdiginiń, saıası partııalardyń ókilderi qatysty.
