Jańaqorǵandyqtar Syrdarııadan tóngen qaýipke jumyla tótep berýde
QYZYLORDA. QazAqparat - Syrdarııadan tóngen qaýipke baılanysty Jańaqorǵan aýdanynyń turǵyndary sý qaýpiniń aldyn alýǵa jumyla kiristi, dep habarlady QazAqparat HAA tilshisi.
Aýdan ákimi Ǵ.Ámireev basqaratyn shtab músheleri bul baǵyttaǵy is josparyn bekitip, sý basý qaýpi joǵary nysandar men aýmaqtardy naqtylady. Jumystarǵa 200-ge jýyq adam men 20 tehnıka jumyldyryldy.
«Darııa arnasyn toltyrǵan mol sý, ásirese, Qojakent, Keıden, Baıkenje aýyldaryna aıryqsha qaýip tóndiretindigi belgili bolyp otyr. Bul aýyl turǵyndary ortaq isten shet qalmaı, tasqynǵa tosqyn bolatyn jumystardyń bel ortasynda júr», - delingen aýdan ákimdigi taratqan habarlamada.
Esterińizge sala keteıik, buǵan deıin Syr eliniń Syrdarııa aýdanynda sý tasqynyna qarsy atqarylyp jatqan sharalar týraly habarlaǵan bolatynbyz.
