Jańaqorǵandyq sharýalar balamaly qýat kózin paıdalanady
JAŃAQORǴAN. QazAqparat - Qyzylorda oblysy Jańaqorǵan aýdanyna qarasty Jaıylma eldi mekenindegi «Aqbota-2» sharýa qojalyǵynyń tóraǵasy Qaırat Musataev kún energııasynan qýat alatyn qondyrǵy ornatty, dep habarlaıdy QazAqparat tilshisi.
Tórt túlikti túletip júrgen azamat osylaısha jańa tehnologııaǵa erekshe mán berip, sonyń zor ıgiligin kórip otyrǵan jaı bar.
Sharýa qojalyǵynyń basshysy qazir «Eskitoǵan» jaılaýynda mal jaǵdaıyn jasap otyr. Jaılaý basynda tórt bólmeli úı salyp alǵan. Onda teledıdar, tońazytqysh sekildi tehnıkalyq buıymdar kún energııasy kózinen qýat alatyn qondyrǵy arqyly jumys jasap tur.
«Jańaqorǵan jeri - balamaly qýat kózin alýǵa taptyrmas mekenniń biri. Oǵan jyl on eki aı mol múmkindik bar. Ras, balamaly qýat kózin kádege asyrý úshin bastapqyda shyǵyn shyǵarýǵa týra keledi. Dese de keıinnen sol ıgiliktiń jaqsy tustaryn kóresiń. Qazir biz 8 kún batareıasynan jınalǵan balamaly energııa qosymsha ornatylǵan 6 qýat jınaǵysh qurylǵyǵa jetedi. Sol arqyly qýat kózin alyp otyrmyz. Bul bizge óte tıimdi», - deıdi Qaırat Musataev.
Qojalyq basshysy atalmysh jabdyqtardy jaqynda Qyzylorda qalasynan satyp alǵan. Ony mamandar arnaıy kelip ornatyp berip ketken. Óz qaltasynan shyqqan qarjyǵa ol 8 dana kún energııasy panelderi men qosymsha qurylǵylaryn satyp alǵan.
Osyndaı ıgilikke atalmysh aýdannyń Qyrash aýylynda turatyn Jalbyzbaı Itaıaqov ta qol jetkizip otyr. Ol balamaly qýat kózinen alatyn energııa arqyly úlken aýmaqty jasyl baqqa aınaldyryp otyrǵan jaıy bar.
