Jańaqorǵandyq Muhtar Shahanov kıno túsirýge kóńil bólmek
JAŃAQORǴAN. QazAqparat - Qyzylorda oblysy Jańaqorǵan aýdanynda turatyn jas kásipker Muhtar Shahanov «Nur-Sáýle» toı uıymdastyrý ortalyǵynyń dırektory qyzmetin atqarady, dep habarlaıdy QazAqparat tilshisi.
Jıyrma tórt jastaǵy jigit óziniń isin órkendetýge kúsh saldy. Osy maqsatta túrli oqýlarǵa qatysty. Tıisti oryndardan qarjylaı qoldaýǵa ıe boldy. Jergilikti óńirlik ınvestıtsııa ortalyǵynan berilgen 3 mln teńge nesıege sońǵy úlgidegi sandyq fotoapparat, beınekamera, ózge de qajetti tehnıkalardy aldy. Nátıjesinde jastyǵyna qaramastan óziniń alǵashqy kásibin bastap ketti.
Qazir oılaǵan isi júzege asty. Aýdanda ótip jatqan túrli toılar men basqa da sharalardyń joǵary deńgeıde ótýine ol barynsha atsalysyp keledi.
Jas jigit aldyna úlken maqsattar qoıyp otyr. Keleshekte ózi jetekshilik jasaıtyn kásipkerlik qyzmet aýqymyn keńeıtýdi josparlap otyr. Sol maqsatta kóptegen bıznes-forýmdar, oqytý kýrstary men túrli semınar-trenıngterge qatysady.
«Bıyl Syr óńirinde jappaı kásipkerlikti qoldaý jyly bolyp jarııalandy. Ras, jas kásipkerler men yntaly azamattarǵa qashanda qoldaý kórsetken artyq emes. Men osy maqsatta bıznes-trenerler men tabysty kásipkerlerdiń qundy keńesin tyńdadym. Olardyń aqyl-keńesin óz qyzmetimde kádege jaratyp júrmin», - dedi Muhtar Shahanov.
Endigi kezekte ol jańa jobalardy daıyndap jatyr. Keleshekte kıno jáne derekti fılm túsirýdi josparlap otyr. Bul aýdan jurtshylyǵy úshin de erekshe jańalyqtyń biri bolatyny anyq. Ádette, mundaı oryndar elimizdiń iri qalalary men oblys ortalyqtarynda órkendep keledi. Degenmen aýdan ortalyqtarynda ondaı oryndar kóp emes.
Jańaqorǵan aýdany - shejireli óńirlerdiń biri. Bul óńirden qanshama tarıhı tulǵalar, óner adamdary, bilikti ǵalymdar shyqty. Jergilikti jerde de san alýan tarıhı oryndar bar. Sol dúnıelerdi jınaqtap kıno jáne derekti fılmder daıyndaýǵa nazar aýdarýdy josparlap otyr.
Qazaqtyń arqaly aqyny Muhtar Shahanovpen esimi de, tegi de bir jas jigit osylaısha óziniń rýhanııat álemine jany jaqyn ekenin jasaǵan dúnıeleri arqyly ańǵartyp otyr. Kásipkerlik álemine endi qadam basyp kele jatqan Muhtar aldaǵy ýaqytta oılaǵany júzege asyp, óz jemisin beretinine úlken úmitpen qaraıdy. Ol jaqynda respýblıkalyq sharalardyń birinde «Úzdik jas kásipker» ataǵyna qol jetkizip qaıtty.
