Jańaqorǵanda «Jaıly mektep» ulttyq jobasy aıasynda taǵy bir jańa mektep ashyldy
QYZYLORDA. KAZINFORM - Búgin oblys ákimi Nurlybek Nálibaevtyń qatysýymen Jańaqorǵan aýdanynyń «Saıajaı» shaǵyn aýdanynda «Jaıly mektep» ulttyq jobasy aıasyndaǵy 600 oryndyq bilim oshaǵynyń saltanatty ashylý rásimi ótti.
Іs-sharaǵa Májilis depýtaty Murat Ábenov, jaýapty salalardyń, quqyq qorǵaý organdarynyń basshylary, sala ardagerleri men zııaly qaýym ókilderi qatysty. Aımaq basshysy aýdan turǵyndaryn jańa mekteptiń ashylýymen quttyqtap, atqarylǵan jumystarǵa toqtaldy.
– Memleket basshysynyń tóraǵalyǵymen ótken Úkimettiń keńeıtilgen otyrsynda óńirdiń áleýmettik-ekonomıkalyq damý qorytyndylaryn baıandadym. Prezıdentimiz oblysymyzdyń ekonomıkalyq ósimine oń baǵasyn berdi. Osy jıynda Memleket basshysy Qasym-Jomart Kemeluly: «Bıyl «Jaıly mektep» ulttyq jobasy aıaqtalady. Barlyq aımaqta zaman talabyna saı tirek mektepter jelisi qurylyp jatyr. Meniń tapsyrmammen úsh jyl ishinde taǵy 1300 mektep jańǵyrtýdan ótedi, - degen bolatyn.
Prezıdentimizdiń, Úkimettiń erekshe qoldaýymen Syr óńirinde baıypty bastamalar qolǵa alynyp, jasampaz jobalar júzege asýda. Biz urpaq bilimin arttyrýǵa, qoǵamda ustaz bedelin kóterýge árkez múddelimiz. Turaqty qoldaýdyń arqasynda óńirimizdiń bilim salasy tabysqa jetti. Sáýleti jańarǵan mektepter boı kóterdi. Ótken jyly bilim salasyna bólingen qarjy 270 mlrd teńge bolsa, bıylǵy bıýdjeti 308 mlrd 134 mln teńgege jetti, ıaǵnı 16,9 paıyzǵa artty. Jańa mektepterdiń ashylýy – jaı ǵana ǵımarattardyń salynýy emes, bul jańa dáýirde bilim alatyn ozat oqýshylarǵa jańa múmkindikter syılaý.
Memleket basshysynyń bastamasymen júzege asqan «Jaıly mektep» ulttyq jobasy aıasynda óńirde 6 900 oqýshyǵa arnalǵan 10 mektep qurylysy bastalyp, oblys ortalyǵyndaǵy 900 oryndyq alǵashqy mektepti ótken jyldyń qazan aıynda tabystadyq. Jyl basynda Jańaqorǵan aýdanynyń «Jańaryq» aýylynda, Aral qalasynda 300 oryndyq, Qyzylorda qalasynda 600 oryndyq mektepterdi paıdalanýǵa berdik. Jyl ishinde taǵy 5 «Jaıly mekteptiń» qurylysyn aıaqtaımyz.
Búgin, mine, «Samuryq-Qazyna» aktsıonerlik qoǵamynyń úılestirýimen júzege asyrylǵan, quny 4 mlrd 709 mln teńge bolatyn 600 oryndyq «Jaıly mektepti» el ıgiligine tabystaýdamyz. Biz bul arqyly Jańaqorǵan kentinde qarqyndy ósip kele jatqan «Saıajaı» shaǵyn aýdanyndaǵy balalarymyz baratyn memlekettik mekteptiń máselesin sheshtik. Endi oqýshylarǵa basqa mektepterge qatynaýdyń qajeti joq. Aldymyzda naqty josparlarymyz ben bastamalarymyz áli de kóp. Olardy iske asyrý baǵytyndaǵy jumystarymyzdy jalǵastyra beremiz. Qýanyshtaryńyz qutty bolsyn, - dedi Nurlybek Nálibaev.
Jıynda Murat Ábenov aýdan turǵyndaryn jańa mekteptiń ashylýymen quttyqtap, qoǵam qaıratkeri, Qyzylorda oblysynyń qurmetti azamaty Ibragım Ábıbýllaev batasyn berdi.
Aıta keteıik, ótken jyly aımaǵymyzda 6 mektep boı kóterip, 5 mektepke qosymsha ǵımarat el ıgiligine tabystaldy. Osylaısha Aral aýdany Toqabaı aýylyndaǵy №248, Shıeli kentindegi №252 jáne Janseıit aýylyndaǵy №133 apatty mektepterdiń máselesi sheshildi.
«QazGermunaı» kompanııasynyń demeýshiligimen Qyzylorda qalasynda zamanaýı úlgidegi 350 oryndyq «Oqýshylar saraıy», Jańaqorǵan aýdanynda 200 oryndyq «Oqýshylar úıi» men 50 oryndyq «Óner mektebi» el ıgiligine tabystaldy. Jyl ishinde Shıeli aýdanynda da 200 oryndyq «Oqýshylar úıi» men 50 oryndyq «Óner mektebi» jumysyn bastaıdy.
Oblys ortalyǵyndaǵy «Shyǵarmashylyq akademııasy», mýzykalyq kolledjdiń jańa ǵımaraty mamyr aıynda, daryndy balalarǵa arnalǵan fızıka-matematıka mektep-ınternaty naýryz aıynda aıaqtalmaq.
Bıyl «Bilim berý ınfraqurylymyn qoldaý qory» esebinen Aral aýdanynyń «Jalańash» aýylynan 150 oryndyq mektep salynady. Byltyr 3 mlrd 100 mln teńgege 8 mektep ǵımaratyna kúrdeli jóndeý júrgizildi.
Memleket basshysynyń 1 300 mektepti jańǵyrtý tapsyrmasyna sáıkes aldaǵy 3 jyl ishinde oblystaǵy 51 mektep, onyń 9-y bıyl kúrdeli jóndeýden ótedi.
Saltanatty is-sharada Jańaqorǵan aýdanynyń áleýmettik-ekonomıkalyq damýyna úles qosqan azamattar men zamanaýı bilim ordasynyń qurylysyn júrgizgen merdiger mekemeniń qyzmetkerleri marapattaldy.