Jańaqorǵanda órik aǵashy gúldep jatyr - mamandar muny kórý úshin týrıst tartýdy usyndy
Qyzylorda oblysynyń ońtústik bóliginde ornalasqan Jańaqorǵan aýdanynda búgingi kúnderi kún qabaǵy jyly.
Aýdan aýmaǵynda órik aǵashy jylma-jyl sáýir aıynyń alǵashqy on kúndiginde gúldep jatatyn edi. Bıyl kúnniń jyly bolýyna baılanysty ol naýryz aıynyń aıaǵynan bastalyp ketti.
«Kóktem mezgili tabıǵattyń jasanyp-jańaratyn shaǵy ǵoı. Qytymyr qystan qutylyp, adamdar jaımashýaq ýaqyttyń áserin sezine bastaıdy. Esik aldyndaǵy jemis aǵashtaryna jan bitip, qorshaǵan ortany kórkem kúıge bóledi. Men órik aǵashynyń gúldegenin kóripi, sondaı sezimde boldym», - deıdi Jańaqorǵan aýdanynyń turǵyny Álimjan Erjanov.
Qorqyt ata atyndaǵy Qyzylorda ýnıversıtetinde geografııa jáne bıologııa pánderi boıynsha dáris berip júrgen ǵalym Orazhan Aıdarov mundaı kórkem sátterdi qalt jibermeı, sony tamashalaýǵa shetelden týrıster tartýǵa bolatynyn aıtady.
«Japonııada sakýra aǵashynyń gúldeýin erekshe shara retinde ótkizedi. Ol bizdiń órik, shıe jáne jıde aǵashy sekildi kádimgi aǵash qoı. Árbir tabıǵat qubylysy adamǵa erekshe áser etedi. Biz muny álemdik deńgeıde nasıhattaı alsaq, oǵan týrısterdi tartýǵa bolady. Elimizde órik aǵashynyń kólemi óte az. Qazir olardyń bazardyń baǵasy 1,5-2 myń teńge turady. Shıe de arzan emes. Sondyqtan olar ekinshi jaǵynan ony ekken adamǵa qarjylaı kómek bolatyny taǵy bar. Oǵan bastysy yqylas kerek», - deıdi O.Aıdarov.
