Jańaqorǵanda bilim bóliminiń bastyǵy sybaılastarymen birge 1 mlrd teńge jymqyrǵan

QYZYLORDA. KAZINFORM — 7 aqpanda Jańaqorǵan aýdandyq soty Jańaqorǵan aýdanynyń bilim bólimi basshysy B. Ibragımovqa, bas býhgalteri K. Aıazbaevaǵa jáne 24 mekteptiń býhgalterine úkim shyǵardy.

Olar jalpy somasy 1 mlrd teńgeden asa iri mólsherde bıýdjet qarajatyn jymqyrǵany úshin kináli dep tanyldy.

Sot úkimimen mekemeniń basshysyna jáne bas býhgalterine 8 jyl bas bostandyǵynan aıyrý, mektep býhgalterleriniń birine — jas balanyń asyraýynda bolýyna baılanysty 5 jyl merzimge jazasyn keıinge qaldyra otyryp, 7 jyl bas bostandyǵynan aıyrý jazasy taǵaıyndaldy.

Sonymen qatar sottalǵandar memlekettik qyzmette jáne ózge de uıymdarda qyzmet atqarý quqyǵynan ómir boıy aıyrylady.

Úkim zańdy kúshine engen joq.

Sybaılas jemqorlyqqa qarsy qyzmet bilim berý salasyndaǵy jemqorlyq táýekelderine syrtqy taldaý júrgizý barysynda eńbekaqy tóleý qorynan qarajat jymqyrýmen baılanysty turaqty qylmystyq shemalardy ashty:

1) qyzmetkerlerge jalaqy onyń laýazymynan qaraǵanda áldeqaıda kóp aýdarylǵan;
2) jalaqy bilim mekemelerinde resmı túrde tirkelmegen adamdarǵa berilgen;
3) qyzmetkerdiń kart-shottaryna jalaqy eseptelip, al tólem qujattarynda basqa tulǵanyń derekteri kórsetilgen;
4) bir adamǵa aqsha aýdarymdaryn birneshe ret qaıtalaǵan;
5) «óli jandarǵa» — týystary men jaqyndaryna aqsha aýdarǵan.

Býhgalterler mekteptiń býhgalterlik esep júıeleri, ulttyq bilim berý bazasy jáne «Qazynashylyq-klıent» júıesi arasyndaǵy ıntegratsııanyń joqtyǵyn paıdalanǵan.

Olar tólem qujattaryna qolmen túzetý engizip, bıýdjet aqshasyn jymqyrǵan.

Jyl saıynǵy bıýdjettik ótinimderdi qalyptastyrý kezinde jymqyrylatyn qarajat belgilengen.

Aıta ketý kerek, jymqyrý boıynsha buryn ashylǵan shemalar sheńberinde sotqa deıingi tergeýlerdi búginde basqa quqyq qorǵaý organdary júrgizýde.