Jańaqorǵanda 700 taılanǵan shóp órtendi

JAŃAQORǴAN. QazAqparat - Qyzylorda oblysy Jańaqorǵan aýdanynda 700 taılanǵan shóp órtenip ketti, dep habarlaıdy QazAqparat tilshisi.

Oqıǵa Jańaqorǵan aýdany Qyrkeńse aýylynda 7 qarashada saǵat 22.00 shamasynda boldy. Aýdandyq №14 órt sóndirý bólimine aýylda mal qora janyp jatqany jóninde habar kelip túsken.

«Órt sóndirýshiler kórshiles eki úıdiń mal qorasy jalynǵa oranǵanyn anyqtady. Mal qoralardyń tóbesi qamys pen aǵashtan jabylyp, qabyrǵasy kesekten qalanǵan. Órtten bir úıdiń 400, ekinshisiniń 300 taılanǵan jońyshqa janyp ketti. Oqıǵa ornynda órt sóndirýshiler jumys júrgizýde. Órttiń shyǵý sebebi anyqtalýda», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Eske salsaq, budan buryn Qyzylorda oblysynda bes qabatty turǵyn úıden órt shyǵyp, 13 adam evakýatsııalandy.