Jańaqorǵanda 50-ge jýyq ýaq mal qar astynda qalyp qoıdy
QYZYLORDA. QazAqparat - Qyzylorda oblysy Jańaqorǵan aýdanynda qar astynda qalyp qoıǵan 50-ge jýyq ýaq maly qyryldy, dep habarlaıdy QazAqparat tilshisi.
Tabıǵattyń tosyn qubylysy 14 naýryzda aýdannyń taý betkeıinde ornalasqan Súttiqudyq, Qosúıenki, Qyrash aýyldyq okrýgterindegi sharýa qojalyqtaryna edáýir shyǵyn alyp keldi. Tekseris jumystarynyń barysynda 50-ge jýyq qoıdyń qyrylǵany anyqtaldy.
«Tabıǵattyń tótenshe jaǵdaıyna baılanysty Jańaqorǵan aýdanynyń azamattyq qorǵaý garnızonynan 6 qyzmetker, 1 tehnıka, aýdan ákimdiginen 8 qyzmetker, 4 tehnıka jumyldyryldy. Qazir atalǵan maqsatta arnaıy komıssııa quryldy», - dedi oblystyq tótenshe jaǵdaılar departamenti bastyǵynyń mindetin atqarýshy Rýslan Qaıraqbaev.
Naýryz aıynyń 12-13 naýryz aralyǵynda Jańaqorǵan, Shıeli aýdandarynda aýa raıy kúrt qubyldy. Bul joldaǵy qozǵalysqa birshama qıyndyq alyp kelgen.
«Osyndaı jaǵdaıǵa baılanysty uzyndyǵy 246 shaqyrymdy quraıtyn «Qyzylorda-Túrkistan» avtojoly eki márte jabyldy. Shıeli, Jańaqorǵan aýdanynda 11 tehnıka jumyldyryp, tazalaý jumystary júrgizilýde. Qazir kólik qozǵalysyna kedergi joq. Apattyq jaǵdaı bolǵan joq», - dedi «Qazavtojol» UQ»AQ Qyzylorda oblystyq fılıalynyń bólim basshysy Nurlybek Úsenov.
Budan buryn Qyzylordada jeke turǵyn úıde gaz jarylyp, tórt adam qaza boldy.
