Jańaqorǵanda 12 jasar qyzdy aıýandyqpen óltirgen qylmysker kinásin moıyndady
QYZYLORDA. QazAqparat - Qyzylorda oblysy Jańaqorǵan aýdanyna qarasty Shalqııa kentinde 12 jasar jasóspirimdi zorlap, aıýandyqpen óltirgen qylmysker óz kinásin tolyq moıyndady, dep habarlaıdy QazAqparat.
Jantúrshigerlik oqıǵadan keıin eseńgirep qalǵan turǵyndar pedofıldi halyq aldynda sottap, oǵan aýyr jazanyń taǵaıyndalǵanyn qalaıdy. Tipti, qamaýǵa alynǵan jigittiń otbasysyn aýyldan kóshirýdi de talap etip otyr. Úreıge boı aldyrǵan jandar óz balalarynyń ómiri úshin qatty alańdaıtyndaryn aıtady.
«Bul sumdyq jaǵdaı ǵoı. Aýylymyzdy pedofılder qaptap ketti. Kúndiz balamyzdy dalaǵa shyǵarýǵa qorqatyn boldyq. Quqyq qorǵaý organdary osylaı qol qýsyryp otyra bere me? Halyqtyń qazir ashýy qara qazandaı. Bul jigittiń otbasy Shalqııadan kóship ketýi kerek. Olaı bolmaıynsha biz tynyshtyq tappaımyz deıdi», - aýyl turǵyny Amankeldi Jazybaev.
Qylmys 18 shilde kúni kúndiz bolǵan. Kóz jumǵan qyzdyń otbasy Shalqııadaǵy eski bes qabatty úılerdiń birinde turǵan.
Turǵyndardyń aıtýynsha, qylmysker jasóspirimniń úıinde jalǵyz ózi qalǵandyǵyn paıdalanǵan. Aldymen, jas qyzdy zorlap, ony joǵary qabattardyń birine aparyp tastaǵan. Óziniń áreketin jasyrý maqsatynda, jasóspirimniń basyn 25 kelilik shlakoblok kirpishimen urypty.
«Bul baryp turǵan aıýandyq qoı. Qyzdyń denesinde saý jer qalmaǵan. Basy múldem joq. Keshkisin namazyn shyǵaryp, kómýge májbúr boldyq. Anasynyń jaǵdaıy qazir óte aýyr. Ol ózi 3 qyzyn asyrap otyrǵan kisi. Kenttegi zaýytta eden jýýshy bolyp jumys jasaıdy. Qyzynyń kisi qolynan qaza bolǵanyn áli aıtqanymyz joq. Tamaqtan ýlanyp óldi dep aıtýǵa májbúr boldyq. Aı kúnniń amandyǵynda osylaısha balalarymyzdan aıyrylyp qalyp jatyrmyz», - deıdi taǵy bir kent turǵyny Anar Báıimbetova.
Qazir qolǵa túsken kúdikti qamaýǵa alynǵan. Óz kinásin tolyq moıyndapty. 1987 jyly týǵan jigit osy aýylda anasymen birge turǵan. Eshqaıda jumys jasamaıtyn azamat buryn da birneshe márte sotty bolyp kelgen eken. Jańaqorǵandyqtardy aýyldarynda pedofılderdiń kóbeıip ketkendigi qatty alańdatady.
«Osydan shamamen on kún buryn meniń qyzymdy osy kenttiń turǵyny zorlamaq bolǵan. Abyroı bolǵanda, qyzymnyń shyńǵyrǵan daýysyn kelinim estip qutqaryp úlgergen. Qazir qylmystyq is qozǵalyp, tergeý júrip jatyr. Qyzym týystarymnyń úıinde. Qatty qorqyp qalǵan. Myna jaǵdaıdy estise, múldem Shalqııaǵa kelmeı qalatyn shyǵar. Bul máseleni bıliktegiler nazarǵa alýlary tıis. Biz balalarymyz úshin qorqamyz deıdi», - Jámıla Ábisheva.
Osylaısha, úsh myńnan astam turǵyny bar aıadaı aýyldyń búginde mazasy qashqan. Turǵyndar kúndelikti ákimdik aldyn torýyldap, qandy-qol qylmyskerlerdiń aldyn-alý úshin naqty árekettiń jasalǵandyǵyn kútedi.
«Biz qylmysker jigittiń otbasysyn bul aýylda turǵyzbaımyz. Esi bar bolsa olar ózderi kóship ketkenderi durys. Qolǵa túsken qylmyskerdiń anasy únemi araqqa sylqıyp júredi. Halyq aldyna shyǵyp, balasynyń jasaǵan áreketi úshin keshirim de suramady. Bul másele ýshyqpaý úshin olardy kóshirip jibergen durys», - deıdi kent turǵyny Gúlnar Aqpambetova.
Qazir atalmysh oqıǵaǵa baılanysty qylmystyq is qozǵalǵan, tergeý júrip jatyr.
«Kúdikti azamat buryn urlyq úshin sotty bolǵan. Tergeý amaldary júrip jatyr. Sol sebepti artyq aqparat bere almaımyz», - dep qysqa qaıyrdy Qyzylorda oblystyq ishki ister departamenti tergeý basqarmasynyń bastyǵy Ábdibek Jańazarov.
