Jańaqalalyq turǵyn salmaǵy 50 kg jaıyn ustady
ORAL. QazAqparat - Jańaqala aýdany Másteksaı aýylynyń turǵyny Álimbaı Aıǵalıev salmaǵy 50 keli jaıyn ustady. Bul týraly Jańaqala aýdandyq «Jańarǵan óńir» gazetiniń bas redaktory Ómirzaq Aqbasov jazdy.
Másteksaılyq Álimbaı Aıǵalıev kásibı balyqshy emes. Dese de, bar ómiri balyǵy taıdaı týlaǵan Qaraózenniń jaǵasynda ótip jatqandyqtan, oqta-tekte jaıynǵa qarmaq laqtyrmaı júrmeıdi. Birde irisi, birde ýaǵy degendeı, qur qol qaıtpaıdy áıteýir.
Bıyl da ózen muzy erip bolǵan tusta, aýyl tusyndaǵy ózenge jemin shanshyp, qarmaq qurdy. Kún áli salqyn, balyq ýyldyryq shashýǵa erte, aýlaýǵa tyıym salynbaǵan kez. Oljaly bolam degen dámesi az edi.
Ertesine saýmalap qaraǵan qarmaǵy aýyr tartty. Іlikken kishileý nárse emes. Qarmaq baýy myqty edi. Biraz alysyp, qarmaǵyn qapqan jaıyndy jaǵaǵa áýpirim dep áreń shyǵardy. Olja dep osyny aıt! Dáý jaıyn, uzyndyǵy eki metr shamasynda. Salmaǵy 50 keliden asypty.
Sóıtip, jasy alpystan asqan aýyl azamaty úlken oljaǵa kenelsem degen bir muratyna jetti. Oljany qyzyq kórip, tamashalaǵan aýyldastary az bolǵan joq.
