Jańaqalada ozyp shyqqan jas dombyrashylarǵa qomaqty júldeler tapsyryldy - BQO

ORAL. QazAqparat - Jańaqala aýdany ortalyǵy Jańaqala aýylynda Qazaq handyǵynyń 550 jyldyǵyna, Uly Jeńistiń 70 jyldyǵyna jáne Q.Jantileýov atyndaǵy aýdandyq balalar mýzyka mektebiniń 40 jyldyǵyna oraı 12-17 jas aralyǵyndaǵy jas dombyrashylar baıqaýy uıymdastyryldy.

Oral qalasyndaǵy D.Nurpeıisova atyndaǵy №1 balalar mýzyka mektebi halyq aspaptary bóliminiń meńgerýshisi, dombyrashy-ustaz Asqar Kenjeǵalıevtiń aıtýynsha, atalmysh saıysqa Aqjaıyq, Zelenov, Qaztalov, Syrym, Jańaqala aýdandary men Oral qalasynan barlyǵy 17 úmitker qatysyp, baq synady. Olar eki kezeńnen turatyn saıysta Mahambet, Qurmanǵazy, Dına, Qaýenniń týyndylarymen qosa shertpe kúılerdi de oryndady.

Oblys kóleminde mundaı sharalar ótip júrgenimen, bul baıqaý júldeleriniń qomaqtylyǵymen erekshelendi. Aıtalyq, bas júldeni ıelengen jańaqalalyq Aǵedil Uzaqovqa úlken teledıdar tabys etildi. Oral qalasynan kelip, birinshi orynǵa kóterilgen Áset Shaımardanǵa beınekamera, Qaztalov aýdany Jalpaqtal aýylynan kelgen Turlyhan Ábýhanov pen Fatıma Ǵaınıetovaǵa ekinshi júlde - noýtbýkter berildi. Úshinshi oryn ıegerleri, oraldyq Aıda Amangeldıeva, Ámir Ǵaısın jáne jalpaqtaldyq Azamat Ǵubaıdýllın uıaly telefondar jáne maqtaý qaǵazdarymen marapattaldy. Baǵaly syılyqtarmen atalyp ótilgen basqa oqýshylar da qur qalǵan joq.

Baıqaýdyń ótýine qarjylaı qoldaý kórsetken aýdan ákimi Lavr Haıretdınov kúı eli atanǵan Jańaqalada osyndaı saıystardyń aldaǵy ýaqytta da uıymdastyrylatynyn jetkizdi.