Jańaǵa jol ashamyz - Prezıdent Teleradıokesheni jańa jobalar maýsymyn tanystyrdy
Tanystyrylymda Prezıdent Teleradıokesheniniń qurylymyndaǵy bólimshelerdiń - quramyna Jibek Joly telearnasy men aǵylshyn tilinde kontent taratatyn Silk Way arnasy, Silk Way Cinema jańa arnasy kiretin Jibek Joly teleotaýy, sondaı-aq ǵasyrdan asatyn tarıhy bar Kazinform halyqaralyq aqparat agenttigi men Derekti kıno ortalyǵynyń jetistikteri usynyldy.
Sharada Prezıdenttiń ishki saıasat máseleler jáne kommýnıkatsııalar jónindegi kómekshisi Rýslan Jeldibaı men Mádenıet jáne aqparat mınıstri Aıda Balaeva quttyqtaý sóz sóıledi.
Prezıdent Teleradıokesheniniń jańa maýsymy Jibek Joly telearnasynyń jańa jobalarymen ǵana emes, jańartylǵan Kazinform agenttiginiń tanystyrylymymen de erekshe.
Kazinform halyqaralyq aqparat agenttigi damýdyń jańa kezeńine aıaq basyp otyr.
Jańa tehnıkalyq platformaǵa aýysyp, jańa saıt retinde túrlenip jatyr jáne únemi jetildirilip otyrady.
Agenttiktiń aqparat saıasatynda da ózgerister bar. Aqparat berý tásili ózgerip, mýltımedıalyq mazmuny úlesi artyp keledi.
Agenttik standartty aqparat taratýdan biregeı eksklıýzıvti mazmun usynýǵa kóship otyr.
Ondaı biregeı aqparat Qazaqstan aýmaǵymen shektelmeı, Ortalyq Azııa men búkil álemdi qamtıdy.
