Jańadan tirkelgen «Respýblıkalyq jas tarıhshylar qaýymdastyǵy» óte qajet - Memleket tarıhy ınstıtýty
ASTANA. 31 shilde. QazAqparat - 29 shilde kúni jas ǵalymdardyń zertteý jumystaryn úılestirý mindeti qoıylǵan, «Respýblıkalyq jas tarıhshylar qaýymdastyǵy» zańnamalyq tirkeýden ótti. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Memleket tarıhy ınstıtýtynyń dırektory, tarıh ǵylymdarynyń doktory Búrkitbaı Aıaǵan málim etti.
«Jas tarıhshylar qaýymdastyǵy óte qajet dep oılaımyn. Biz úshin óte mańyzdy. Tarıhta ǵana emes, sonymen qatar basqa ǵylymda da sońǵy kezde jastar azaıyp ketti, ıaǵnı olar bızneske, munaı salasyna, zańgerlikke betburys jasady. Osy oraıda bul qaýymdastyqtyń negizgi minedeti - ol jas ǵalymdarǵa jol berý, olarǵa kómektesip, qoldaý jasaý, jas ǵalymdardyń muń-muqtajyn memleket aldynda aıtyp otyrý. Bul turǵyda materıaldyq muqtajdyq bar», - dedi tarıhshy.
Onyń sózine qaraǵanda, jas tarıhshylardyń kúsh-qýatyn paıdalanyp, elimizde tarıhshylardyń jańa býynyn tárbıeleýge erekshe kóńil bólinbek. «Biz jastarǵa kóp úmit artamyz. Baǵymyzǵa qaraı, bizde jaqsy ǵalymdar bar», - dep túıdi B. Aıaǵan.
