Jańadan taǵaıyndalǵan QR Bilim jáne ǵylym mınıstri - Sárinjipov Aslan Bákenulynyń ómirbaıany
ASTANA. 2 qyrkúıek. QazAqparat - Memleket basshysynyń Jarlyǵymen QR Bilim jáne ǵylym mınıstrligine jańa basshy taǵaıyndaldy. QazAqparat Sárinjipov Aslan Bákenulynyń ómirbaıanyn usynady.
Sárinjipov Aslan Bákenuly 1974 jyly 17 sáýirde týǵan. Qazaq. Ekonomıka ǵylymdarynyń kandıdaty, joǵarǵy bilimdi ákimshilendirý salasyndaǵy Pensılvanııa Ýnıversıtetiniń doktory (AQSh). Qazaq memlekettik ekonomıkalyq ýnıversıtetin, Oklahoma ýnıversıtetin (AQSh), Vena dıplomatııalyq akademııasyn támamdady. Sonymen qatar, Garvard ýnıversıteti Kennedı atyndaǵy memlekettik saıasat mektebinde taǵylymdamadan ótken.
1996 jyly eńbek jolyn Ortalyq Azııa memleketaralyq keńesi Atqarýshy komıtetiniń referenti bolyp bastady. 1997 jyly Qazaqstan Respýblıkasy Respýblıkasy Syrtqy ister mınıstrliginiń ortalyq apparatyna aýysty. 1998-2002 jyldary Qazaqstannyń AQSh-taǵy Elshiliginde ekonomıkalyq máseleler jónindegi attashe qyzmetin atqardy (Vashıngton). 2002-2007 jyldary Dúnıejúzilik banktiń Orta Azııa boıynsha ınfraqurylymdar, qarjylyq naryq jáne bilim máseleleri jónindegi joba úılestirýshisi boldy. Sonymen qatar, Qazaqstan Respýblıkasy Bilim berýdi damytýdyń memlekettik baǵdarlamasyn ázirleýge qatysty. 2007-2009 jyldary QR Úkimetiniń jáne Ulttyq banktiń janyndaǵy «Ulttyq taldaý ortalyǵy» AQ Basqarmasy tóraǵasynyń orynbasary qyzmetin atqaryp, ekonomıkalyq damý, qarjy jáne bilim salalaryna jetekshilik jasady. 2009-2013 jyldary - «Nazarbaev ýnıversıteti» derbes bilim berý uıymy Atqarýshy keńesiniń tóraǵasy boldy. «Nazarbaev Ýnıversıteti» bilim mektebiniń qaýymdastyrylǵan professory. «Nazarbaev ýnıversıteti» DBBU-nyń qurylǵanynan bastap qamqorshylyq keńesiniń múshesi. 2013 jylǵy 2 qyrkúıekte Qazaqstan Respýblıkasy Prezıdentiniń Jarlyǵymen Qazaqstan Respýblıkasynyń Bilim jáne ǵylym mınıstri bolyp taǵaıyndaldy.
2012 jyly «Qurmet» ordenimen marapattaldy.
