Jańadan saılanǵan Prezıdent qyzmetine kiriskende Vıtse-Prezıdent ókilettigin toqtata ma
ASTANA. KAZINFORM — Vıtse-Prezıdent derbes memlekettik organdy basqarmaıdy. Bul týraly Ádilet mınıstri Erlan Sársembaev aıtty.
Búgin Parlament palatalarynyń birlesken otyrysynda Prezıdent týraly Konstıtýtsııalyq zań jobasy birinshi oqylymda maquldandy.
Qujatty talqylaý barysynda senator Bekbolat Orynbekov Ádilet mınıstrinen: Konstıtýtsııaǵa sáıkes, Úkimet jańadan saılanǵan Quryltaı aldynda óz ókilettikterin doǵarady dep kórsetilgen. Sondaı-aq Konstıtýtsııalyq zań jobasynyń 20-baby 1-tarmaǵyna sáıkes, Prezıdentke tikeleı baǵynatyn jáne esep beretin memlekettik organdar basshylarynyń ókilettikteri jańa saılanǵan Prezıdent qyzmetine kiriskende toqtatylady. Bul rette olar Memleket basshysy jańa basshylardy taǵaıyndaǵanǵa deıin óz mindetterin atqarady dep kórsetilgen. Uqsas tetik Astana qalasy, oblystar, respýblıkalyq mańyzy bar qalalar ákimderi úshin de kózdelgen. Osyǵan baılanysty suraǵym, bul tetikti Vıtse-Prezıdent laýazymyna qoldaný, ıaǵnı, jańadan saılanǵan Prezıdent qyzmetine kirisken kezde onyń ókilettigin toqtatý múmkin dep oılaımyz ba?, — dep suraǵan edi.
Saýalǵa jaýap bergen mınıstrdiń aıtýynsha, Vıtse-Prezıdent ınstıtýtyn engizý — ol memlekettik basqarý júıesiniń turaqtylyǵy men úzdiksiz jumysyn qamtamasyz etýge baǵyttalǵan.
— Vıtse-Prezıdent derbes memlekettik organdy basqarmaıdy. Ol tek Prezıdent atynan ókildik etedi. Osy ustanymdy eskere otyryp, jańadan saılanǵan Prezıdent aldynda óz ókilettigin avtomatty túrde toqtatý qajet dep sanamaımyz, — dedi Erlan Sársembaev.
Budan buryn Quryltaı – Qazaqstan Parlamentiniń quqyqtyq mırasqory – konstıtýtsııalyq zań jobasy maquldanǵanyn jazdyq.
