Jańadan saılanǵan aýyl ákimderiniń orta jasy 45-te

ASTANA. QazAqparat – Jyl sońyna deıin eldegi 199 aýylda ákim saılaýy ótedi. Bul týraly Memlekettik keńesshi Erlan Qarın Telegram paraqshasynda jazdy, dep habarlaıdy QazAqparat.

«13 tamyzda elimizdiń 7 oblysynda 17 aýyldyń ákimi saılandy. Sońǵy eki jylda Prezıdenttiń saıası reformalar baǵdarlamasy aıasynda aýyl ákimderin halyqtyń ózi tikeleı saılaıtyn boldy. Osy ýaqytqa deıin 1 668 aýyl, aýyldyq okrýg, aýdandyq mańyzy bar qala ákimderi saılandy», - dep jazdy Erlan Qarın Telegram paraqshasynda.

Bul rette úmitkerlerdiń 75 paıyzyn saıası partııalar usynsa, qalǵan 25 paıyzy – ózin-ózi usynýshylar.

Sondaı-aq, saılanǵan ákimderdiń jartysynan astamy (57,4%) buryn mundaı qyzmet atqarmaǵan. Bul aýyl ákimderiniń korpýsy aıtarlyqtaı jańardy degen sóz.

«Budan bólek jergilikti ákimder quramy da birshama «jasardy». Búginde saılanǵan ákimderdiń ortasha jasy 45 jasty quraıdy. Aldaǵy jeksenbide, 20 tamyz kúni 3 oblystaǵy 21 aýyl ákiminiń saılaýy ótedi. 2023 jyldyń sońyna deıin barlyǵy 199 eldi mekende jańadan ákimder saılanady. Osylaısha aýyl ákimderin saılaý elimizdiń saıası ómirinde qalypty qubylysqa aınaldy», - deıdi E. Qarın.