Jańadan salynǵan turǵyn úı naryǵynda baǵa tómendedi

NUR-SULTAN. QazAqparat – Bir jylda (2021 jylǵy tamyzdan beri) qaıta satylatyn páter baǵasy – 25,8%, jańa páter baǵasy – 18,1%, al jalǵa alý quny – 31,8% artty. Bul týraly QazAqparat Ulttyq statıstıka bıýrosyna silteme jasap habarlaıdy.

Óńirler boıynsha alsaq, jańa salynǵan turǵyn úı naryǵynda jyldyq mánde baǵa Aqtóbe qalasynda – 32,5%-ǵa, Nur-Sultanda – 27,6%-ǵa, Qostanaıda – 26,3%-ǵa qymbattady.

Al, qoldanystaǵy baspana saýdasynda baǵa ósimi boıynsha kóshbasshylar – Qyzylorda qalasy (48,4%), Nur-Sultan qalasy (40,8%), Óskemen qalasy (39,9%), Taldyqorǵan qalasy (36,5%).

Turǵyn úıdi jalǵa berý naryǵy boıynsha Almaty qalasynda baǵa bárinen qymbat – 62,5%.

Sonymen qatar, bir aıdyń ishinde (tamyz - shilde) páterlerdi qaıta satý baǵasy 0,4% ósti, al jańa turǵyn úıdi satý 0,1% tómendedi. Abattandyrylǵan turǵyn úıdi jalǵa alý tólemi shildemen salystyrǵanda tamyzda 12,4% joǵarylady.

«QR SJRA Ulttyq statıstıka bıýrosy turǵyn úı baǵasy boıynsha aı saıyn monıtorıng júrgizedi. Baǵa ındeksteri oblys ortalyqtary men Nur-Sultan, Almaty, Shymkent qalalary boıynsha iriktep baıqaý derekteri negizinde qalyptastyrylady. Jańa turǵyn úıler boıynsha aqparat satý operatsııalaryn júrgizetin qurylys kompanııalarynan jınalady, bul rette páterdiń bastapqy jáne taza árlengendegi baǵasy eskeriledi. Páterlerdi qaıta satý jáne jalǵa alý boıynsha derekter ınternette, buqaralyq aqparat quraldarynda ornalastyrylatyn habarlandyrýlar negizinde jınalady. Baǵalardy esepteý kezinde bir, eki, úsh bólmeli páterler boıynsha usynystar esepke alynady», - delingen Bıýro habarlamasynda.