Jańadan salynǵan bilim nysandarynyń sapasy qandaı - depýtat pikiri
ASTANA. QazAqparat - Jańadan salynǵan bilim nysandarynyń sapasy jaqsy, syn kótermeıtinderi de bar. Bul týraly búgin Májiliste «Nurly jol» baǵdarlamasy aıasynda salynǵan bilim nysandarynyń qurylysyna qatysty pikir bildirgen depýtat Pavel Kazantsev aıtty, dep habarlaıdy QazAqparat tilshisi.
«Paıdalanýǵa berilgen mektepterdiń sapasyn túrli baǵalar edim. Óte tamasha sapada salynǵan mektepter bar. Jazǵy kezeńde depýtattar óńirlerde barynsha sapaly, sáıkesinshe ınfraqurylymy men jabdyqtary bar nysandardy kórdi. Munan bólek, sapasyn jaqsartý qajetti nysandar da bar. Degenmen, tolyqtaı alǵanda jaǵdaıdy túzetýge bolady», - dedi ol otyrys aıasynda BAQ ókilderine bergen suhbatynda.
Osy rette depýtat jaǵdaıdy túzetýge ýaqyttyń bar ekendigine senimdi ekenin basa aıtty.
«Qazir biz ketip bara jatqan poıyzdyń vagonyna otyraıyq dep turǵanymyz joq. Alda 2019 jyl bar. Bul baǵdarlamasy sońyna deıin jetkizýge, aıaqtaýǵa ýaqytymyz jetkilikti. Sondyqtan da qazir bul áńgime kóterilip otyr. Sebebi jaǵdaıda túsinip, der ýaqytynda sharalar qabyldaý úshin aralyq jospardyń qorytyndysyn shyǵarmaqpyz», - dedi Pavel Kazantsev.
Onyń paıymynsha, elimizdiń Bilim jáne ǵylym mınıstrligi bilim nysandary qurylysy tóńiregindegi túıtkildi máselelerdi erterek kóterýi tıis bolatyn.
«Menińshe, barlyq ýaqytta da basyna, ıaǵnı Bilim mınıstrligine qaraýy tıis dep oılaımyn. Eger olar qarjylandyrý protsesine, jergilikti atqarýshy organdardyń óndiristik tsıkline yqpal ete almasa da keminde "attan" salý kerek edi. Qazir depýtattar dabyl kóterip otyr», - dedi Májilis depýtaty.
