Jańadan qurylǵan Saýran aýdanynyń halqy 100 myńnan asatyn bolady
TÚRKІSTAN. QazAqparat – Jańadan qurylǵan Saýran aýdanyna qatysty barlyq is-sharalardyń júzege asýymen arnaıy komıssııa aınalysady. Bul týraly Aptalyq apparat otyrysynda oblys ákimi Ómirzaq Shókeev aıtty, dep habarlaıdy QazAqparat.
«Memleket Basshysynyń Jarlyǵyna sáıkes, Túrkistan oblysynda jańa Saýran aýdany quryldy. Ákimshilik ortalyǵy - Shornaq aýyly bolady. Oǵan Shaǵa, Jańa Iqan, Eski Iqan, Úshqaıyq, Iassy, Oranǵaı, Qarashyq, Júınek, Babaıqorǵan, Shornaq, Jibek joly, Maıdantal aýyldyq okrýgteri kiretin bolady. Sondyqtan búgin tarıhı kún. Biz osyǵan baılanysty tez arada barlyq sharalardy júzege asyrýymyz kerek»,-dedi oblys ákimi Ómirzaq Shókeev.
Jańa saýran aýdanynyń ákimshilik ortalyǵy – Shornaq aýyly bolady. Kentaý qalasynyń quramynan Shaǵa, Jańa Iqan, Eski Iqan, Úshqaıyq, Iassy, Oranǵaı, Qarashyq, Júınek, Babaıqorǵan, Shornaq, Jibek joly, Maıdantal aýyldyq okrýgteri shyǵarylyp, Saýran aýdanyna ótedi.
Ult rýhanııatynda kıeli uǵymǵa aınalǵan «Saýran» ataýynyń Túrkistan oblysynda qurylǵan jańa aýdanǵa berilýi negizdi. Ortaǵasyrlyq tarıhı Saýran qalasy Uly Jibek jolynyń boıynda ornalasqan jáne ejelgi Túrkistan uǵymymen tyǵyz baılanysty. Saýran – XII ǵasyrda iri saýda ortalyǵy retinde irgetasy qalanǵan. XIII ǵasyrdyń orta shenide Saýran – Aq Ordanyń astanasy bolǵan. Shornaq aýyly oblys ortalyǵy Túrkistan qalasynan soltústik – batysqa qaraı 20 shaqyrym jere ornalasqan. Búginde munda 12 myń halyq turady. Jańadan qurylatyn aýdan halqynyń sany 100 myńnan asatyn bolady. Kentaý qalasynda ornalasqan 12 aýyldyq okrýgterinen jańa aýdan, Shornaq aýylyn ákimshilik ortalyǵymen jalpy kólemi 650 myń gektar jerde ornalasqan.
Eske salaıyq, bıylǵy 19 aqpanda halyq aldynda esep bergen Túrkistan oblysynyń ákimi Ómirzaq Shókeev óńirde jańa – Saýran aýdanyn qurý týraly QR Prezıdenti Qasym-Jomart Toqaevqa usynys berilgenin málim etken edi.
Bul usynysty óńir basshysy aldymen, ótken jyldyń sońynda Kentaý qalasy men onyń aýyldyq okrýgteriniń turǵyndaryna usynǵan bolatyn. Jergilikti halyq Saýran aýdanyn qurý týraly Ó.Shókeevtiń bastamasyn qýanyshpen qoldady.
Kentaý qalasy Túrkistan qalasymen qatar birdeı damytylatyny josparlanǵan.
Sondaı-aq bıylǵy 14 naýryzda QR Mádenıet jáne sport mınıstrligi Mádenıet jáne óner isteri departamentiniń dırektory Kúmis Seıitovanyń tóraǵalyǵymen ǵylymı-ádistemelik keńestiń kezekti otyrysy ótti. Onda kóne Saýran qalashyǵyn damytý máselesi talqylandy.
