13:44, 04 Qarasha 2022 | GMT +6
Jańadan qurylǵan oblystarda kásipkerler palatasynyń ókildigi ashyldy
ASTANA. QazAqparat – Abaı, Jetisý jáne Ulytaý oblystarynda «Atameken» Ulttyq kásipkerler palatasynyń óńirlik fılıaldary jumys isteıdi. Bul týraly sheshim palatanyń H sezinde shyǵaryldy, dep habarlaıdy QazAqparat atameken.kz saıtyna silteme jasap.
Ulttyq palata basqarma tóraǵasynyń orynbasary Tımýr Naqypbekov óńirlik kásipkerler palatasyn qurý bıznestiń quqyǵy men múddesin qorǵaý mindetterin iske asyrý úshin qajet ekenin atap ótti.
«UKP barlyq kásipkerdi bıznes jumysynyń zańnamalyq jáne ózge de normatıvtik qaǵıdalaryn qalyptastyrý protsesine keńinen qamtýy jáne tartýy kerek. Sondaı-aq, kásipkerlik sýbektilerin bıznesti memlekettik qoldaý sharalary týraly habardar etýi tıis», - dedi Tımýr Naqypbekov jańadan qurylǵan óńirlik palatalardyń mańyzy týraly.
Sondaı-aq, sezd delegattardyń qaraýyna jańadan qurylǵan óńirlik keńesterdiń sandyq quramyn anyqtaý týraly másele shyǵaryldy. Abaı jáne Jetisý oblystarynda keńeske shaǵyn, orta jáne iri bıznestiń 25 ókili, Ulytaýda 15 ókili qosylady.
