Jańadan qurylǵan mınıstrlikterdi bólý protsesi qashan aıaqtalady

ASTANA. QazAqparat – Premer-Mınıstrdiń orynbasary – Qarjy mınıstri Erulan Jamaýbaev jańadan qurylǵan mınıstrlikterdi bólip shyǵarý men qarjylandyrýǵa qatysty túsinik berdi, dep habarlaıdy QazAqparat tilshisi.

«Ázirge qarjylandyrýǵa qatysty esepteýler atqarylmady. Jańartylǵan Úkimet múshelerimen alǵashqy otyrys ótti. Onyń barysynda Joldaýdy oryndaý boıynsha tapsyrmalar talqylandy. Jańa mınıstrlikterdi bir aıdyń ishinde bólemiz. Osy baǵytta biraz protsedýrany iske asyrý kerek. Sodan keıin qosymsha shyǵyndardy esepteımiz», - dedi E.Jamaýbaev Parlament Májilisinde tilshiler suraǵyna jaýap bere otyryp.

Bul turǵyda spıker 2024-2026 jyldarǵa arnalǵan respýblıkalyq bıýdjet jobasy Májilistiń qaraýyna engizilgenin, 11 qyrkúıekte osy qujat tanystyrylatynyn aıtty. Májilistegi tanystyrylym barysynda bólingen qarajat egjeı-tegjeıli qaralady. Sonyń aıasynda qosymsha shyǵyndar talqylanady.

«Jańadan qurylǵan mınıstrlikter basqa bir vedomstvodan bólinip shyǵyp jatyr. Sondyqtan bıylǵa qarastyrylǵan qarajat kóleminde jańa mınıstrlikterdi bólip shyǵaramyz. Ár mınıstrliktiń ózine qarasty salalyq baǵyttary bar. Osy oraıda olar ózine tıesile qarajatty bólip alady. Al ákimshilik shyǵyndarǵa toqtalsaq, qyzmetkerler sanyna qaraı bólemiz», - dedi mınıstr.

Aıta keteıik, jaqynda Prezıdent Jarlyǵymen, 5 jańa mınıstrlik quryldy, olar – Sý resýrstary jáne ırrıgatsııa mınıstrligi; Kólik mınıstrligi; Týrızm jáne sport mınıstrligi; Mádenıet jáne aqparat mınıstrligi; Ónerkásip jáne qurylys mınıstrligi.