Jańadan qurylǵan Qoǵamdyq palata quramyna oppozıtsııa ókilderi tartylmaq

NUR-SULTAN. QazAqparat – Májilis tóraǵasy Erlan Qoshanov jańadan qurylǵan Qoǵamdyq palatanyń quramyna oppozıtsııa ókilderin usyndy, dep habarlaıdy QazAqparat tilshisi.

«Meniń oıymsha, búgin biz talqylap jatqan másele – óte mańyzdy másele. Bul keıbir depýtattar aıtqandaı «qoıshyny kóbeıtý» emes. Bizge taǵy da bir qosymsha alań ashyldy. Prezıdent qyzý pikirtalastar kóshede emes, mıtıngterde emes, osy Májilis qabyrǵasynda bolýy kerektigin aıtqanyn bilesizder. Sol úshin osy Palata qurylyp otyr. Qoǵamdyq palatanyń quramy kelesi aptada aıtylady. Osy ınstıtýt aıasynda buǵan deıin Parlament qabyrǵasyndaǵy talqylaýlarǵa qatyspaǵan sarapshylar keledi. Búginge deıin mundaı qoǵamdyq talqylaýlar bolǵan joq. Osy Palata aıasynda úlken talqylaýlar bolady degen úlken úmitim bar», - dedi Májilis spıkeri.

Sondaı-aq ol Qoǵamdyq palata músheleri asa rezonansty degen zańdardyń jobasyn talqylaýǵa shaqyrylatynyn atap ótti.

«Taıaýda jeke tulǵalardyń bankrottyǵy jóninde úlken zań keledi. Sondaı-aq, Áleýmettik kodeks jobasy talqylanady. Otbasy ınstıtýtyn damytý týraly zań jobasy qaralady. Munyń bári – qoǵamda qyzý pikir týdyryp júrgen úlken máseleler. Biz sonyń bárimen keri baılanys ornatýymyz kerek. Azamattar kóshedegi mıtıngterge emes, osy jerge kelsin. Biz soǵan múmkindik bereıik», - dedi Erlan Qoshanov.

Onyń paıymynsha, qoǵammen osyndaı fomatta keri baılanys ornatýdyń mańyzy zor.

«Búgingi tańda, ókinishke qaraı, bizge aıtylyp júrgen syn kóp. Shynymyzdy aıtaıyq, «Zań shyǵarýshylar halyqtan alshaqtap ketken» degen túsinik bar. ıAǵnı, halyq bir jaqta, qoǵam bir jaqta, zań bir jaqta jumys istep jatyr degen pikir bar. Sondyqtan Qoǵamdyq palatanyń basty maqsaty – neǵurlym ózekti, rezonansty máselelerdi birinshi oqylymǵa deıin qoǵamnyń talap-tilegi turǵysynan qarastyrý, basty erekshelik osy. Budan bylaı rezonansty máselelerdi talqylaǵan kezde beınebaılanys arqyly óńirlerdegi qoǵamdyq keńesterdi de qosýymyz kerek. Solar arqyly jergilikti azamattardyń pikirin eskere alamyz. Palatanyń quramy zańdardyń erekshelikterine, baǵyttaryna baılanysty ózgerip turady. Basym kópshiligi depýtattar emes, qoǵam belsendileri bolady. Múmkin konstrýktıvti oppozıtsııa deımiz, olardy da qatystyraıyq. Úkimettik emes sektordyń ókilderi de tartylady», - dedi Májilis tóraǵasy.

Aıta keteıik, Májilis tóraǵasy Erlan Qoshanov Ulytaýda ótken Ulttyq quryltaıda palata janynan ártúrli ustanymy bar saıası uıymdar ókilderin, sarapshylar men qoǵam belsendilerin qatystyratyn Qoǵamdyq palata qurý týraly usynys aıtqan edi.