Jańadan qurylatyn Turǵyn úı qurylysy biryńǵaı operatorynyń negizgi qyzmeti qandaı
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı baǵdarlamalary operatorlarynyń sanyn qysqartý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zań jobasy Qazaqstan Prezıdenti Qasym-Jomart Toqaevtyń tapsyrmasyn iske asyrý maqsatynda Parlament depýtattary bastamashylyǵymen ázirlendi.
«Osy zań jobasy 2020 jylǵy 8 sáýirde birinshi oqylymda maquldandy. Talqylaý kezinde atap ótilgendeı, turǵyn úı baǵdarlamalarynyń jumys istep turǵan úsh operatoryn Turǵyn úı qurylysynyń biryńǵaı operatory etip biriktirýge, sondaı-aq olardyń qaıtalanatyn fýnktsııalaryn joıýǵa jáne jalpy ákimshilik shyǵystaryn qysqartýǵa baǵyttalǵan», - dedi Májilis depýtaty Sapar Ahmetov.
Zań jobasynda Turǵyn úı qurylysynyń biryńǵaı operatorynyń kelesi normalary engizilgen: ıpotekalyq turǵyn úı qaryzdaryna kepildik berý, úleskerlerdiń quqyqtaryn qorǵaý tetigin qoldaný arqyly kóppáterli turǵyn úıdiń qurylysyn aıaqtaýǵa kepildikter berý, ınvestıtsııalyq jobalardy qarjylandyrý men iske asyrý jónindegi qyzmetterin reglamentteý.
Eske sala keteıik, bıyl sáýir aıynda Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı baǵdarlamalary operatorlarynyń sanyn qysqartý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldanǵan bolatyn.
Zań jobasy turǵyn úı baǵdarlamalarynyń jumys istep turǵan operatorlary «Qazaqstan ıpotekalyq kompanııasy» AQ-ny, «Báıterek development» AQ men «Turǵyn úı qurylysyna kepildik berý qory» AQ-ny Turǵyn úı qurylysynyń biryńǵaı operatory etip biriktirýge baǵyttalǵan.
