Jańadan qurylatyn Baılanys jáne aqparat mınıstrligi basty nazardy memlekettik tilde shyǵatyn BAQ-ǵa baǵyttaýy tıis - Memleket basshysy
ASTANA. Naýryzdyń 12-si. QazAqparat /Rýslan Ǵabbasov/ - Baılanys jáne aqparat mınıstrligi basty nazardy otandyq buqaralyq aqparat quraldaryn odan ári damytýǵa,
birinshi kezekte memlekettik tilde shyǵatyn BAQ-ǵa aýdarýy kerek. Bul týraly búgin Aqordada Úkimet músheleriniń jáne oblys ákimderiniń qatysýymen ótip jatqan Indýstrııalyq damý máseleleri jónindegi keńeste Elbasy Nursultan Nazarbaev málim etti, dep habarlaıdy QazAqparat.
«Biz aqparattyq qoǵamda ómir súremiz. Sondyqtan jańa mınıstrliktiń basty mindeti - jańa aqparattyq tehnologııalardy engizý, birinshi kezekte sandyq jáne spýtnıktik habar taratý bolýy kerek. Sonymen qatar basty nazardy otandyq BAQ-dy odan ári damytýǵa, birinshi kezekte memlekettik tilde shyǵatyn BAQ-ǵa aýdarýy kerek», dep qadap aıtty Prezıdent.
Tıimdi aqparattyq júıeni qalyptastyrý kerektigin jetkizgen Elbasy, bul óz kezeginde elimizdiń barlyq kórermenderine teń múmkindikterdi ashatyndyǵyn jetkizdi. «Qazaqstan azamattary álemde, memlekette ne bolyp jatqanyn naqty túrde bilýge quqyly», dedi Memleket basshysy.
