Jańadan ashylǵan Metabolızmdik sındromdy emdeý ortalyǵynda kásibı bilikti dárigerler quramy jasaqtaldy
ASTANA. QazAqparat - Ulttyq medıtsınalyq holdıngi bazasynda Metabolızmdik sındromdy emdeý ortalyǵy ashyldy.
«Ortalyqty qurýdyń negizgi maqsaty - aýrý túrleriniń ýshyǵýyna jol bermeý turǵysyndaǵy jańa bilimdi jáne túsinikterdi kópshilikke jetkizý. Atap aıtqanda, júrek-qan tamyrlary men onkologııalyq dertterdiń aldyn alýǵa baılanysty. Sondyqtan osy syrqattarǵa shaldyǵýy múmkin adamdarmen jumys isteýdi maqsat tutyp otyrmyz»,-dedi búgin Astanada ótken baspasóz máslıhatynda «Ulttyq medıtsınalyq holdıng» AQ basqarma tóraǵasy Álibek Kennet.
Á. Kenettiń sózine qaraǵanda, metabolızmdik sındrom bes negizgi faktormen aıqyndalady. Birinshisi - abdomınaldyq semizdik, ekinshisi - qan qysymynyń joǵarylaýy, úshinshisi - qan quramynda qant deńgeıiniń artýy, tórtinshisi - holesterın almasýynyń buzylýyna jáne sońǵy faktor qan quramynda trıglıtserıdterdiń joǵary deńgeıine baılanysty.
«Atalǵan bes faktordyń úsh kórsetkishi oryn alsa, onda bul adam metabolızmdik sındrommen shaldyqty dep sanaımyz. ıAǵnı, osy oraıda túrli indetterdiń damýy múmkindiginiń táýekeli artady. Sondyqtan osy faktorlardy der kezinde anyqtap, ýaqtyly emdeý, ár emdelýshi azamattyń jaǵdaıyn aıtarlyqtaı jaqsarta alady»,-dedi ol.
Belgili bolǵandaı, ortalyq jumysyna medıtsınanyń túrli salasyndaǵy kásibı mamandar jumyldyrylyp otyr. Olar adamdardy emdeýmen qatar, ǵylymı zertteýlermen aınalysyp, jınaqtalǵan tájirıbeni Qazaqstannyń óńirlerine taratýǵa yqpal etpek.
Aıta keteıik, Dúnıejúzilik densaýlyq saqtaý uıymy semizdikti jahandyq indet dep moıyndap otyr. DDSU boljamy boıynsha 2025 jylǵa qaraı semizdikke shaldyqqandar san álemde 300 mıllıonǵa jetpek.
