Jańadan ashylǵan iri ken oryndarynyń 50 paıyzdan kóbi memleketke tıesili bolady - Májilis

ASTANA. KAZINFORM – Budan bylaı ıgeriletin iri ken oryndarynyń negizgi  bóligi memlekettiń qolynda bolady. Májilistiń jalpy otyrysynda palata tóraǵasy Erlan Qoshanov osyndaı málimet keltirdi.

- Sońǵy jyldary qabyldanǵan barlyq zańǵa Prezıdenttiń «ádilettilik ıdeıasy» arqaý bolǵanyn atap ótken jón. Jerdiń astyndaǵy jáne ústindegi qazyna-baılyq halyqtyń menshigi degen normany Konstıtýtsııaǵa shegelep jazdyq. Qazir bul prıntsıp «Ulttyq qor – balalarǵa» zańy arqyly júzege asyrylyp jatyr. Budan bólek, jańadan ashylǵan iri ken oryndarynyń 50 paıyzdan kóbi memleketke tıesili bolady, - dedi ol.

Májilis spıkeri Prezıdenttiń tikeleı pármenimen zańsyz alynǵan aktıvterdi qaıtarý týraly zań qabyldanǵanyn eske saldy.

- Sonyń nátıjesinde eki trıllıon teńgege jýyq aktıv elge qaıtaryldy. Osynyń bári – Prezıdent reformalarynyń jemisi. Tarıhı ádilettilikti qalpyna keltirýge baǵyttalǵan batyl qadamdar, - dedi Erlan Qoshanov.

Buǵan deıin Premer-mınıstr Oljas Bektenov Úkimettiń resmı saıtyna «Іlgerileýge bastaǵan alty jyl: Qazaqstan ornyqty damý jolynda» maqalasyn jarııalaǵan edi.