Jańadan ashylatyn jekemenshik mektepter memlekettik tapsyrysty oryndaı almaıdy - Balaeva

ASTANA. KAZINFORM – Premer-mınıstrdiń orynbasary, Mádenıet jáne aqparat mınıstri Aıda Balaeva Úkimet otyrysynda jekemenshik mektepterdiń jumysy qalaı rettelip jatqanyn aıtty.

- Búginde bilim berý salasynda pılottyq rejımde jekemenshik mektepterdi tsıfrlyq esepke alýdy, negizgi protsesterdi avtomattandyrýdy jáne bıýdjetteý júıesimen sınhrondaýdy kózdeıtin jańa tetik engizildi. Nátıjesinde 785 jekemenshik mektep tolyq tsıfrlandyryldy, - dedi ol.

Aıda Balaeva memlekettik qarjylandyrý endi tek óńirdegi naqty qajettilik bar jekemenshik mektepterge ǵana baǵyttalatynyn atap ótti.

- Bıýdjet qarajatyn tıimdi ári maqsatty paıdalaný úshin jańa jekemenshik mektepterge memlekettik tapsyrysty ornalastyrýǵa moratorıı engiziledi.

Memlekettik qarjylandyrý endi tek óńirdegi naqty qajettilik bar jekemenshik mektepterge ǵana baǵyttalady. Bul rette memlekettik mektepterdiń bolmaýy, úsh aýysymdy oqytýdy joıý jáne apatty mektepterdiń ornyna jańa bilim berý nysandarynyń salynýy negizgi basymdyq retinde aıqyndalyp otyr.

Bilim salasyna jekemenshik ınvestıtsııany tartý úshin memlekettik tapsyryssyz, tek ınvestıtsııalyq shyǵyndy óteý mehanızmi saqtaldy.

Osy sharalarmen qatar, Oqý-aǵartý mınıstrligi múddeli memlekettik organdarmen birlesip, jekemenshik mektepterge lıtsenzııadan keıingi baqylaý júrgizedi. Baqylaý aıasynda bilim berý sapasynyń saqtalýyna, pedagog kadrlarmen qamtamasyz etilýine jáne balalardyń qaýipsizdigine erekshe nazar aýdaramyz, - dedi vıtse-premer.

Buǵan deıin Oqý-aǵartý mınıstrligi 60 oryndyq jeke menshik mektepke 600 oqýshynyń aqshasyn bólgeni málim bolǵan edi.