Janabylovtar isi: Blogerlerge qatysty sot úkimi shyqty
ASTANA. KAZINFORM — Astana qylmystyq soty erli-zaıypty blogerler Erbolat Janabylov pen Elmıra Tólegenovaǵa qatysty úkim shyǵardy.
Sońǵy sózinde Elmıra Tólegenova protsessýaldyq kelisim jasaý týraly ótinish bildirgen. Prokýror buǵan qatysty ustanymyn jarııa etti.
Onyń aıtýynsha, aıyptalýshylar men prokýror arasynda kináni moıyndaý týraly mámile túrinde protsessýaldyq kelisimge qol jetkizilgen.
Kelisimdi eskere otyryp, prokýror Erbolat Janabylovqa eki jyl shartty túrde bas bostandyǵynan aıyrý jazasyn surady.
Al Tólegenovaǵa memlekettik aıyptaýshy eki jyl bas bostandyǵynan aıyrý jazasyn taǵaıyndap, onyń oryndalýyn eki jylǵa keıinge qaldyrýdy surady.
Qorǵaý tarapy bas bostandyǵynan aıyrýdan ózge jaza taǵaıyndaýdy ótindi.
Sondaı-aq, prokýror aıyptaý tarapy azamattyq talap-aryzdan bas tartqanyn málimdedi. Óıtkeni, qorǵaý jaǵy keltirilgen zalaldyń ótelgenin rastaıtyn qujattardy usynǵan.
Sot úkimimen erli-zaıypty blogerler Qylmystyq kodekstiń eki baby boıynsha kináli dep tanyldy. Olar — 214-bap «Zańsyz kásipkerlik», 218-bap «Qylmystyq jolmen alynǵan aqsha qarajatyn zańdastyrý (jylystatý)».
Sot Erbolat Janabylovqa 2 jyl shartty túrde bas bostandyǵynan aıyrý jazasyn taǵaıyndap, probatsııalyq baqylaý belgiledi. Sondaı-aq, onyń múlki tárkilenedi.
Elmıra Tólegenovaǵa sot 2 jyl bas bostandyǵynan aıyrý jazasyn taǵaıyndap, jazany eń tómengi qaýipsizdik mekemesinde óteýdi jáne múlkin tárkileýdi belgiledi. Sonymen qatar, onyń kámeletke tolmaǵan úsh balasynyń bolýyna baılanysty jazany óteý 2 jylǵa keıinge qaldyryldy.
Aıta keteıik, erli-zaıyptylar 247 653 229,5 teńge kólemindegi keltirilgen zalaldy ótegen. Osyǵan baılanysty sot azamattyq is boıynsha óndiristi toqtata turý týraly sheshim qabyldady.
— iPhone 16 markaly, jady 528 gıgabaıt 17 uıaly telefon, sondaı-aq Hyundai Elantra markaly 8 avtokólik memleket menshigine tárkilensin, — dedi sýdıa.
Sonymen qatar, sot úkim zańdy kúshine engennen keıin Lamborghini Urus jáne Lexus RX 600 markaly avtokólikterge salynǵan tyıym alynyp tastalatynyn málimdedi.
Sot aıyptalýshylardan jábirlenýshilerge ótemaqy qoryna 20 AEK mólsherinde, ıaǵnı 78 640 teńge májbúrli tólem óndirý týraly qaýly etti.
Budan bólek, úkimge sáıkes, Janabylovqa probatsııa qyzmetin habardar etpeı turǵylyqty jerin jáne jumys ornyn ózgertýge, kelisimsiz óńirden shyǵýǵa, sondaı-aq jumysqa baılanysty emes jaǵdaıda alkogol ishýge ruqsat etilgen oıyn-saýyq oryndaryna barýǵa tyıym salynady.
Oǵan medıtsınalyq maqsattan tys psıhoaktıvti zattardy qoldanýǵa tyıym salynady jáne túngi ýaqytta úıde bolýǵa mindetteledi. Jumyssyz bolǵan jaǵdaıda ol jumyspen qamtý organdaryna tirkelýi tıis.
Aıta keteıik, 2025 jyly 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovanyń áreketi Qazaqstan Týrızm jáne sport mınıstrligi nazaryna ilikken bolatyn.
2025 jyldyń 16 qazanynda bloger Janabylovtarǵa qatysty qylmystyq is qozǵaldy.
2026 jyly 13 naýryzda Janabylovtar isi sotqa joldandy.
Prokýror bloger Janabylov pen áıelin 4 jylǵa sottaýdy suraǵan bolatyn.
