Jańaarqada turǵyn úı qabyrǵasyn tsementsiz qalaǵan merdigerge 1,2 mln teńge aıyppul salyndy

JEZQAZǴAN. QazAqparat – Ulytaý oblysyna qarasty Jańaarqa aýdanynda turǵyn úı qabyrǵasynyń kirpishin tsementsiz qalap jatqan merdiger kompanııa jazalandy. Baspanaǵa kezekte turǵandarǵa beriletin úsh qabatty 17 úıdiń qurylysy memlekettik saraptamadan qaıta ótkiziledi, dep habarlaıdy QazAqparat tilshisi.

«Iá, zań buzýshylyqtar anyqtaldy. Úsh jolaqty tsementsiz salǵan. Sol úshin merdiger mekemege 400 AEK kóleminde aıyppul salyndy. Hattama toltyryldy. Sondaı-aq, tehnıkalyq baqylaý organyna da 60 AEK kóleminde aıyppul salyndy. Sonymen qatar, onyń attestatyn alty aıǵa toqtattyq», - deıdi oblystyq memlekettik sáýlet-qurylys baqylaý basqarmasynyń basshysy Qaırat Qamzın.

Belgili bolǵanyndaı, Jańaarqa aýdanyndaǵy úsh qabatty úılerdi «AgroPromRemStroı» kompanııasy salyp jatyr. Sońǵy qabatyn kóterip úlgermegen joba úshin ol qazynadan 500 mln teńge alyp úlgergen.

Buǵan qosa, sapasyz qurylysqa ruqsat bergen tehnıkalyq baqylaýshy organ qyzmet kórsetkeni úshin 10 mln teńgege jýyq qarjy alǵan. Endi bul mekeme aldaǵy jarty jyl boıy nysandardy qadaǵalaý qyzmetimen aınalysa almaıdy.

Al, atalǵan 3 qabatty 17 úıdiń qurylysy memlekettik saraptamadan qaıta ótkiziledi. Tártiptik jazaǵa Jańaarqa aýdandyq qurylys bóliminiń basshysy da tartyldy.

Eske salaıyq, osydan bir aı buryn aýdan turǵynynyń sapasyz salynyp jatqan qurylysty áshkerelegen vıdeosy áleýmettik jelide taraǵan bolatyn. Qurylysy byltyr bastalǵan turǵyn úı «Nurly jer» memlekettik baǵdarlamasymen salynyp jatyr.