Jańaarqada Aqseleý Seıdimbektiń keshe qoıylǵan eskertkishi buzylyp jatyr

JEZQAZǴAN. QazAqparat – Keshe Jańaarqada jazýshy, etnograf-ǵalym Aqseleý Seıdimbekke qoıylǵan eskirtkish búgin buzylyp jatyr. Bul týraly Ulytaý oblysy ákiminiń orynbasary Ǵalymjan Qusmanǵalı óziniń Facebook-tegi resmı paraqshasynda jazdy, dep habarlaıdy QazAqparat tilshisi.

«Kesheden beri olqy shyqqan eskertkish jaıly qazaqtyń ár azamaty óz oıyn aıtyp, janashyrlyq tanytyp jatyr. Keshe eskertkishti ornynan alyp, músindi qaıta jańǵyrtý sharalaryn qoldanatynymyz jaıly aıtqan bolatynmyn. Búgin Aqseleý aǵamyzdyń aǵaıyn-týysymen kezdesip, barlyq jaǵdaıdy túsindirdim. Sonymen qatar, usynysymdy aıttym. Dál qazir kóńilge qonymsyz jasalǵan músindi buzý jumystary bastaldy», - dep jazdy óńir ákiminiń orynbasary.

Aıta keteıik, keshe qazaqtyń birtýar tulǵasy Aqseleý Seıdimbektiń 80 jyldyq mereıtoıyna oraı Ulytaý oblysynyń Jańaarqa aýdanynda eskertkish ashylǵan bolatyn.

Ǵalymjan Qusmanǵalıdiń aqparatynsha, týyndy Aqseleý Slanulynyń inisi Asylhan Seıdimbektiń jeke qarajatyna jasalǵan.

Keıin jazýshy qurmetine qoıylǵan esketkish jeli qoldanýshylary men turǵyndardyń synyna ushyrady. Olardyń pikirinshe, tas tuǵyr kórkemdik turǵydan sapasyz jasalǵan.

Osyǵan baılanysty keshe Ulytaý oblysy ákiminiń orynbasary Ǵalymjan Qusmanǵalı eskertkish alynyp tastalyp, ornyna basqasyn qoıatynyn málimdegen edi.

Tıisinshe ony buzý jumystary búgin qolǵa alynǵan.