Jańa jylǵy túnde Astanada qansha sábı ómir esigin ashty
ASTANA. QazAqparat - Astanadaǵy ekinshi perzenthanada Jańa jyl túni 8 bala dúnıege keldi. Báriniń jaǵdaılary jaqsy. Al bul joly toı toılatýǵa shamalary kelmegen analar úılerine asyq, dep habarlaıdy 24.kz.
Kishkentaı Hákim birneshe saǵat buryn dúnıege keldi. Anasy Ásııa Eltaeva ýaqyty jaqyndaǵanymen, dál Jańa jyl túninde bosanamyn dep oılamapty. «Bastysy qol-aıaǵy aman, deni saý ul dúnıege keldi», - deıdi ol. Endi Hákim Jańa jylmen birge jyl saıyn týǵan kúnin de atap ótedi.
Ásııa Eltaeva, ana: - Ótken jyldyń bizge degen syıy dep qabyldaý kerek shyǵar. Qýanyshymyz Jańa jylmen tuspa-tus keldi. Barshańyzdy merekeńizben quttyqtaımyn, densaýlyq, molshylyq tileımin. Árqaısyńyzǵa Alla taǵala bala berip, jarylqasyn». Shaqalaqtardyń aman-esen dúnıege kelýi - dárigerlerdiń de eńbegi. Olar úshin demalys ne jumys kúni degen túsinik joq. Jańa jylda da ádettegideı at ústinde. Óıtkeni elimizdiń demografııasy artýy úshin jumys isteýge ant bergeni bar.
«Balanyń dúnıege kelýine atsalysý, anasyna kómektesý, halqymyzdyń sanyn arttyrýǵa úles qosý - meniń jumysym. Óıtkeni bala degen baqyt qoı. Olar - bizdiń bolashaǵymyz. Sondyqtan akýsher, onyń ishinde gınekolog bolýdy tańdadym», - deıdi Farıza Daırabaeva.
Astananyń ekinshi perzenthanasynda táýligine ortasha eseppen 20 bala dúnıege keledi eken. Keıde bul kórsetkish eki ese artyp, 40-qa jetetin kúnder de bolady. Tarıh qoınaýynda qalǵan keshegi jańa jyldyq tún tynysh ótti. Bul da qazaq halqynyń sanyn 8 adamǵa kóbeıtken kásibı dárigerlerdiń arqasy dep qabyldaý kerek.
