Jańa jylǵa nemeremizge qaýipsiz oıynshyq alǵanymyzdy qaıdan bilemiz - Saǵyntaev
ASTANA. QazAqparat - QR Premer-Mınıstri Baqytjan Saǵyntaev tutynýshylar quqyqtaryn qorǵaý máselesi boıynsha tek statıstıkamen ǵana shektelmeı, tártip buzatyn kásipkerler men olardyń taýarlary týraly aqparatty ashyq jarııalaýdy usyndy, dep habarlaıdy QazAqparat tilshisi.
«Osy jerde densaýlyqqa zııandy taýarlardy tasyp júrgen 50 kásipkerdi anyqtadyq dep otyrmyz. Al xalyq olardyń kim ekenin bile me? Qandaı taýardy almaý qajettigin túsine me? Olar erteń dúkenge barǵanda dál sol taýarlardy almaýy qajet qoı. Oıynshyqtar bolsa, naqty qaı oıynshyqtar ekenin kórsetý kerek. Aldymyzda jańa jyl, balalarymyz men nemerelerimizge oıynshyqtardy kóptep ala bastaımyz. Al taýarlardyń qanshalyqty qaýipsiz ekenin qaıdan bilemiz? Ol týraly aqparat joq qoı», - dedi B.Saǵyntaev Úkimettiń búgingi otyrysynda.
Osy oraıda Premer-Mınıstr sapasyz taýarlar týraly xalyqty únemi qulaqtandyrý qajettigin jetkizdi.
Aıta keteıik, QR Densaýlyq saqtaý mınıstri Eljan Birtanovtyń sózine qaraǵanda, bıylǵy tekserister kezinde tamaq ónimderiniń 7,3 paıyzy talapqa saı emes bolyp shyqty. Sonyń basym bóligi - shetelden keletin taýarlar.
«Jalpy, 172 myń tonnadan astam taýarlar ýtılızatsııaǵa jiberildi. Sebebi xalyq densaýlyǵyna zııandy. Atalǵan taýarlardyń ishinde balalarǵa arnalǵan ónimder de az emes. Osy oraıda oıynshyqtardyń 36,6 paıyzy balalar úshin zııandy ekenin erekshe atap ótken jón. Ondaı oıynshyqtardyń quramynda ýly zattar, ıa bolmasa, jaraqat salý qaýpi bar. Ondaı oıynshyqtardyń basym bóligi Qytaı men Túrkııadan jetkiziledi», - deıdi E.Birtanov. 7
