Jańa jyldyń birinshi kúni Astana temirjol vokzalynda sábı dúnıege keldi
1 qańtarda Qostanaı-Almaty baǵytymen júrip kele jatqan poıyz Astana stantsııasynda toqtap turǵan edi. Kóp uzamaı temirjol vokzalynyń medıtsına bólimshesine bosanaıyn dep jatqan kelinshek jetkizildi.
Araılym Asqarbekova kúıeýimen jáne eki jasar balasymen Qostanaıdan Tarazdaǵy týysqandaryna jol tartyp kele jatqan. Poıyzdyń jolserigi áıeldiń ózin jaısyz sezinip turǵanyn kórip, tez arada poıyz basshysy men Astana stantsııasynyń temirjol vokzal basshysynyń kezekshi kómekshisine habarlady.
Poıyz jolserikteri jedel túrde kelinshekti vagonnan zembil kómegimen temirjol vokzalynyń medıtsına bólimshesiniń kezekshi medbıkesine jetkizdi.
Saǵat 11 shamasynda kishkentaı sábı dúnıege keldi. Jedel járdem brıgadasy barlyq qajetti medıtsınalyq kómek kórsetti.
Sábı men onyń anasy aman-esen perınataldy ortalyqqa jetkizildi, dep habarlady «Qazaqstan temir joly» UK» AQ baspasóz qyzmetinen.
«Saparmyzdyń aldynda ózimdi jaqsy sezingen edim. Barlyǵy maǵan úlken iltıpatpen qarady. Poıyz basshysyna, medbıkege, jolserikterge, jedel járdem brıgadasyna, balamnyń aman-saý týylýyna kómektesken adamdarǵa alǵysym sheksiz. Ulymyzdyń atyn Ábdirahman dep qoıdyq», - dep Araılym Asqarbekova qýanyshymen bólisti.
