Jańa jyldyń alǵashqy saǵatynda Kcell jáne Activ abonentteri 9,2 mıllıonnan astam qońyraý shalyp, 2,5 mln. derlik SMS-habarlama joldady
ASTANA. 5 qańtar. QazAqparat - Uıaly baılanys operatory GSM Qazaqstan/Kcell Jańa jyl túninde óz abonentterin úzilissiz baılanyspen qamtamasyz etti, sonyń arqasynda Kcell jáne Activ abonentteri ózderiniń týysqandary men jaqyndaryn Jańa jyldyń alǵashqy mınýtynda quttyqtaı aldy.
Bul týraly kompanııanyń baspasóz qyzmeti taratqan málimdemede habarlandy.
Kompanııa óz jelileriniń ótkizý qabiletin ulǵaıtýǵa arnalǵan barlyq qajetti sharalardy aldyn ala ázirledi. Baılanysta týyndap qalatyn máselelerdi jedel túrde sheshý úshin, kompanııanyń ondaǵan qyzmetkeri Jańa jyl túninde jumys oryndarynda kezekshilik etti, "Abonentterimizdiń Jańa jyldyq túnniń alǵash mınýttarynda týǵan-týysqandaryna telefon soǵyp, jyly lebizdi quttyqtaýlaryn kedergisiz aıta bilý qabilettigi bizdiń kompanııa úshin aıryqsha mańyzdy", - dep atap ótti Kcell kompanııasynyń Aqparattyq-kommýnıkatsııalyq tehnologııalar departamentiniń dırektory Faık Chytlak. - Ótken jyldaǵydaı júıemiz bar júkteýlerdi kótere aldy, bul biz úshin óte úlken maqtanysh».
Qoldanylǵan sharalar nátıjesinde, Kcell jáne Activ abonentteri uıaly baılanys qyzmetin úzilissiz paıdalaný múmkindigine ıe boldy. 31 jeltoqsanda abonentter shalǵan qońyraýlar sáttiligi 99 paıyz qurady, al Jańa jyl túninde bul kórsetkish 97 paıyzǵa teń boldy, sonymen birge Jańa jyldyń alǵashqy saǵattarynda abonentter 25 mıllıonnan astam qońyraý shalyp, 6,3 mıllıonnan astam SMS-habarlama joldady. Jylpy alǵanda, 31 jeltoqsan men 1 qańtar kúnderi kompanııa abonentteri 191,5 mıllıon qońyraý shaldy. Ádettegi kúndermen salystyrǵanda, Jańa jyl meıramynda shalynǵan qońyraýlar sany 1,5 ese artty, al abonentter joldaǵan qysqa habarlamalar kólemi 5 esege ósti.
