Jańa jyldyq shyrshalar daıyndaýda tabıǵı shyrshalardy paıdalaný 40 myń danadan 13 myń danaǵa deıin qysqardy -AShM
ASTANA.Jeltoqsannyń 11-i. QazAqparat - QR Aýyl sharýashylyǵy mınıstrligi Orman jáne ańshylyq sharýashylyǵy komıtetiniń jańa jyldyq shyrshalar daıyndaý maqsatynda aǵash kesý kezinde alynatyn qylqan japyraqtylardyń butaqtary men ushar bastarynan qurap jasalatyn shyrshalardy ótkizý jónindegi bastamashylyǵynyń nátıjesinde sońǵy úsh jylda respýblıkada tabıǵı shyrshalardy paıdalaný 40 myń danadan 13 myń danaǵa deıin qysqardy,
dep habarlıdy Qazaqparat AShM baspasóz qyzmetine silteme jasap.
Memlekettik orman ıelenýshilerdiń jańa jyldyq shyrshalar daıyndaýy men bosatýy, burynǵy jyldardaǵydaı, oblystar ákimdikteriniń ótinimderi negizinde Komıtettiń ruqsatymen uıymdar men mekemelerde mádenı buqaralyq is-sharalar ótkizý úshin ǵana júrgiziledi.
Ústimizdegi jyly halyqqa satýǵa qylqan japyraqtylardyń butaqtary men ushar bastarynan qurap jasalatyn shyrshalar ǵana konteınerlermen kelip túsedi, al ımporttalatyn jańa jyldyq shyrshalardy satý kezinde satýshynyń shyrshalardy satyp alý jáne ótkizý qujattary, sondaı-aq saýda oryny úshin tólem jasalǵany týraly qujaty bolýy qajet.
Aǵashty zańsyz kesýmen, súrekti talan-tarajyǵa salýmen jáne orman zańnamasyn buzýdyń basqa da kórinisterimen kúrestiń tıimdiligin arttyrý, sondaı-aq orman zańnamasyn buzýshylarǵa qoıylatyn talap-aryzdardyń keltirilgen nuqsannyń mólsherimen sáıkes balamalylyǵyn qamtamasyz etý maqsatynda Qazaqstan Respýblıkasy Úkimetiniń 2007 jylǵy mamyrdyń 31-degi № 441 qaýlysymen orman zańnamasyn buzý keltirgen nuqsannyń mólsherin esepteýge arnalǵan bazalyq stavkalar bekitilgen.
Kórsetilgen qaýlyǵa sáıkes jańa jyl aldyndaǵy kezeńde (qarasha-jeltoqsan) qylqan japyraqtylardyń bir dana jas aǵashyn nemese óskinin joıǵany nemese búldirgeni úshin 15 aılyq eseptik kórsetkish (AEK) mólsherinde zalal óndirip alynady, ol ústimizdegi jyl úshin 19440 teńgeni quraıdy.
Sonymen birge memlekettik orman qorynda zańsyz aǵash keskeni jáne aǵashtardy búldirgeni úshin orman zańnamasyn buzýshylarǵa Qazaqstan Respýblıkasynyń Ákimshilik quqyq buzýshylyqtar týraly kodeksiniń 283-babyna sáıkes jeke tulǵalarǵa 10-15 AEK, al erekshe qorǵalatyn tabıǵı aýmaqtarda 20-25 AEK mólsherinde aıyppul sanktsııalary qoldanylady. Dál osyndaı áreketter úshin laýazymdy tulǵalarǵa, jeke kásipkerlerge, zańdy tulǵalarǵa 30-40 AEK, al iri kásipkerlik sýbektilerine 100-150 AEK, erekshe qorǵalatyn tabıǵı aýmaqtarda 500-1500 AEK mólsherinde aıyppul salynady.
Edáýir mólsherde nuqsan keltirip zańsyz aǵash kesken tártip buzýshylar qylmystyq jaýapkershilikke tartylady.
Jańa jyl aldyndaǵy kezeńde qylqan japyraqty ekpelerdi kúzetýdi kúsheıtý maqsatynda memlekettik orman ıelenýshiler bıyl 400-den astam beketter uıymdastyrdy jáne memlekettik ınspektorlar men orman kúzeti qyzmetkerlerinen 600 top qurdy.
