Jańa jyldy toılaýda qandaı qaýipsizdik sharalaryn saqtaý kerek
«Qalamyzda sanıtarlyq-epıdemıologııalyq shekteýlerge baılanysty, jańajyldyq merekelik is-sharalardy ótkizýden bas tartyldy. Úıdegi qaýipsizdikke kelsek, shyrshalar myqty jáne qulamaıtyn negizge ornatylýy tıis jáne evakýatsııalyq joldarǵa bóget bolmaýy kerek. Shyrshalardyń butaqtary qabyrǵalar men tóbeler arasynda bir metr qashyqtyqty saqtaý kerek. Shyrshaǵa taǵylatyn elektr gırlıandalar elektr qondyrǵylaryn paıdalaný qaǵıdalaryna sáıkes kelý tıis. Onda kerneýligi 12 volttan, al qýaty 25 vattan aspaıtyn shamdar qoldanylýy shart», - dedi Nur-Sultan qalasy TJD Memlekettik órt baqylaý basqarmasynyń bastyǵy Erkin Otarǵalymuly elorda ákimdiginde ótken brıfıngte.
Sonymen birge, spıker jańajyldyq otshashýlardy tek qana ruqsat berilgen, resmı qaýipsizdik talaptaryna sáıkes keletin, taýary sertıfıkattalǵan jerden satyp alýdy usyndy.
«Otshashýdy jeldi kúni paıdalanýǵa bolmaıdy. Onyń nusqaýlyǵymen mindetti túrde tanysý kerek, kózge kórinetin qandaı da bir aqaýy bar otshashýdy paıdalanýǵa tyıym salý qajet. Bilteni qoljetimdi araqashyqtyqta tutatý jáne kem degende 20 metr qashyqtyq saqtaý kerek. Al otshashýdyń ǵımaratqa deıingi aralyǵy 50 metrden kem bolmaýy tıis. Otshashýdy shatyrlar men aǵashtardyń, elektr jelileriniń astynda jáne úı-jaılardyń ishinde atýǵa tyıym salynady», - deıdi E. Otarǵalymuly.
Buǵan deıin spıker jyl basynan beri elordada 587 órt bolǵanyn, 20 adam qaza bolyp, 58 adam jaraqat alǵanyn habarlaǵan edi.