Jańa jyldy qazaqstandyq juldyzdar qalaı qarsy alady? (FOTO)
ALMATY. QazAqparat - 2016 jańa jyldyń bosaǵadan attaýyna sanaýly saǵattar qaldy. Barlyq Qazaqstan halqy jańa jyldy atap ótýge daıyndalýda.
Dúken sórelerinde qyzý saýda júrip jatyr. Ár úıde jańa jyldyq keshki asqa daıyndyq bastalyp ketti. Al qazaqstandyq juldyzdar Jańa jyldy qalaı toılamaq?
Bıbigúl Tólegenova: Syılyqqa kelgen kámpıtti keler jyldyń sońyna deıin jep taýysa almaspyz.
KSRO jáne QazSSR halyq ártisi, kúmis kómeı ánshi Bıbigúl Tólegenova tańnan beri asyǵys daıyndyq ústinde ekendigin aıtty.
«Úıimniń ishi astań-kesteń bolyp jatyr. Qyzym mynda, nemerem anda ketti shapqylap. Qaısysynan bastasam, ne istesem dep men oılanyp otyrmyn. Shaqyrǵan jer kóp. Qyzym aýyryp qalǵandyqtan otbasymyzben úıden shyǵa almadyq. Barýǵa múmkinshilik joq. Jalpy, jańa jyl otbasymen qarsy alatyn meıram ǵoı. Qazirgi damyǵan zamanda jaqyndarymmen telefon, ınternet arqyly sóılesip, quttyqtap jatyrmyz. Ara qashyqtyq ta asa bilinip jatqan joq», - dedi ánshi.
Jańa jyl qarsańynda túrli tyńdarmandary men el azamattarynan Bıbigúl apaıǵa 15 quttyqtaý sebeti jetken. Ánshi sebettegi kámpıtterdi jyldyń sońyna deıin jetetin boldy dep kúlýde.
Arýjan Jazylbekova: Jańa jyldy Prezıdentpen birge qarsy alamyn.
Aktrısa Arýjan Jazylbekova da Jańa jyldy óz úıinde joldasymen birge qarsy alatynyn jetkizdi.
«Dastarhan jaıyp, telearnany qosyp, Prezıdentpen birge qarsy alamyn. Men úshin 2015 jyl óte mańyzdy jetistikterge toly boldy. Men oınaǵan 4 fılm de jaryq kórdi. Keler jyly da Aqan Sataevtyń «Doroga k materı» fılminiń tusaýkeserin kútip otyrmyz», - dedi ol.
Aktrısa meıram qarsańynda alǵan eń biregeı syılyq retinde kúıeýi bergen sómkeni atady.«Meniń joldasym maǵan únemi sómke syılaıdy. Ol men úshin eń baǵaly syılyq», - dedi Arýjan.
Altynbek Qorazbaev: Nemerelerimniń shat-shadyman kúlkisin kórý bir baqyt.
Qazaqstannyń halyq ártisi Altynbek Qorazbaev nemereleriniń shat-shadyman kúlkisin kórýdiń ózi bir baqyt deıdi.
«Bıyl naryq qyspaqqa alǵanmen, jaqsy jyl boldy. Elimiz, balalarymyz nemerelerimizdiń báriniń qabaǵy ashyq, ezýlerinen kúlki aıyrylmaı keledi. 1992 jyldary osy balalarymyzǵa syılyq syılaı almaǵan kezder bolǵan. Bazarda, dúkende túk joq. Al qazir shokoladtyń da túr-túri, buıymdardyń da túr-túri bar. Ony kórip jatqan nemerelerimiz de baqytty. Keleshegimiz aıqyn bolatyny sózsiz. Elbasy aman bolsyn. Keleshekte úlken baı memleket bolatynymyzǵa kámil senemin. Bala-shaǵam ortasynda bolamyn búgin», - dedi A.Qorazbaev.
Ashat Tarǵynov: Jańa jylda úılenýim kerek.
Bıylǵy toılardyń basty repertýaryna aınalǵan «Chıp-chıp» avtory Ashat Tarǵynov bıyl jańa jylyn tuńǵysh ret Almatyda jańa úıinde qarsy almaqshy.
Jylda jambasy jer ıiskemegen súr boıdaq bıyl jańa úıine dostaryn shaqyrmaqshy.
«Men úshin asa sátti jyl boldy. Qýanyshty jaǵdaı kóp boldy. 2015 jyly kóktemde baspanaly boldym. Bıyl Almatyda birinshi ret qarsy alaıyn dep otyrmyn. Byltyr basqa qalada bolǵanmyn. Bıyl úıde bolýǵa nıettenip otyrmyn», - dedi ol.
Ánshi keler Meshin jylyna artar úmiti kóptigin jasyrmady. Tipti jyldyń basynda otbasyn qurý máselesin qarastyrmaqshy.
Ázirge elden alǵan syılyǵynyń aldy ezýi qısyq oıynshyq maımyl bop tur.
Biraq ánshi tyńdarmandarynyń ystyq lebizinen asqan baǵaly syılyq joq deıdi.
«Tyńdarmandarymnan lebizder, hattar jeltoqsannyń 20-synan bastap kelip jatyr. Men olarǵa rızamyn», - dedi ol.
Aıjan Nurmaǵambetova: Meniń jylym týdy
QR Eńbek sińirgen ártisi Aıjan Nurmaǵambetova maımyl jyly bolǵan soń úıine kóp banan, ananas satyp alǵanyn aıtty.
Búgin ánshi de ómirinde birinshi ret jańa jyldy otbasymen qarsy almaqshy.
«Men Keńes odaǵynyń ókili bolǵandyqtan, jańa jyl men úshin erekshe meıram. Daǵdarystyń belgisi kórinis bergen bolýy kerek. Bıyl men eń alǵash ret úıde qalyp otyrmyn. Bul da men úshin óte jaqsy bolyp otyr. Ózim de qonaqqa baramyn. Maǵan da kelem deýshiler kóp. Jańa jyldyq dastarhanǵa meshin jyly bolǵasyn banan men ananas kóp satyp aldym. Men ózim meshin jylynda týylǵanmyn», - dedi A.Nurmaǵambetova.
Erlan Kókeev: Eski jyldy eki aılyq ulymmen shyǵaryp salamyn.
Jaqynda áke atanǵan ánshi Erlan Kókeev bıyl meıramdy búldirshininiń qasynda ótkizbekshi. Onyń ulyna jaqynda eki aı toldy.
«Balamnyń alǵashqy Jańa jylyn meniń meıramhanamda atap ótemiz. Dostarymdy shaqyramyn. Án aıtyp, kóńildi otyramyz», - dedi ol.
Erlan Kókeev bıyl otbasy men qyzmetkerlerine ǵana emes balalar úıiniń tárbıelenýshilerine de syılyqtar jasaǵanyn aıtty.
