Jańa jyldan beri 5 myńǵa jýyq atyraýlyq koronavırýsqa shaldyqty

ATYRAÝ. QazAqparat – Jańa jyldan beri 5 myńǵa jýyq atyraýlyq koronavırýsqa shaldyqty. Endi óńirdegi epıdemıologııalyq ahýaldyń órbýi vaktsına alý men revaktsınatsııaǵa tikeleı baılanysty bolady, dep habarlaıdy QazAqparat.

Atyraý qalalyq Epıdemıologııalyq baqylaý basqarmasy epıdemıologııalyq baqylaý jáne qadaǵalaý bóliminiń basshysy Ásel Muqaevanyń aıtýynsha, byltyrǵy jeltoqsan aıynda aptasyna 30-40 naýqas tirkelgen.

«Qazir Atyraý qalasynda táýligine 400-ge jýyq adamnan qaýipti vırýs belgisi anyqtalyp otyr. Naýqastardyń kúrt kóbeıýine baılanysty karantındik sharalardy kúsheıtý qajet. Óıtkeni, 2021 jyly oblysta koronavırýs ınfektsııasyn 23 238 adam juqtyrdy. Al, bıylyǵy qańtar bastalǵaly beri 5 myńǵa jýyq naýqas tirkeldi. Taldaý kórsetkendeı, qańtardyń alǵashqy aptasynda 59, ekinshi aptada 130, úshinshi aptada 1 myń 936 adam koronavırýs ınfektsııasyn juqtyrdy. Al sońǵy aptadaǵy statıstıkaǵa súıensek, naýqastar sany 2 myń 448-ge jetti», -deıdi Ásel Muqaeva.

Onyń málimetinshe, oblystyq aýrýhananyń juqpaly aýrlar bóliminde 200-den astam naýqas em qabyldap jatyr.

«Naýqastardyń arasynda 76 júkti áıel bar. Jansaqtaý bóliminde 20 naýqas oqshaýlandyrylǵan. Jaǵdaıy óte aýyr 4 patsıent ókpeni jasandy jeldetý apparatyna qosylǵan», - dep málim etti Ásel Muqaeva.

Eske sala ketelik, budan buryn «Qyzyl» aımaqtaǵy Atyraý oblysynda koronavırýs juqtyrǵandar sany azaımaı turǵanyn jazǵan edik.