Jańa jyldan bastap SQO-da sýǵa tarıf kóteriledi
«Qyzyljar sý» kompanııasy sýmen jabdyqtaý men káriz júıesine tarıfti kóterý týraly ótinimdi eki aı buryn bergen. 2017 jyldyń 1 qańtarynan bastap, sý tarıfin jeke tulǵalarǵa - 35%, zańdyq tulǵalarǵa - 38% kóterý boljanǵan edi.
Bes jylǵa bekitilgen «Petropavl qalasynyń káriz jáne sýmen jabdyqtaý júıelerin qaıta óńdeý, jańartý jáne damytý» ınvestıtsııalyq baǵdarlamasy tarıfke qosylǵan. Kompanııa ony júzege asyrý úshin óz qarajaty men zaemdardy, sondaı-aq «Nurly jol» memlekettik baǵdarlamasynyń jáne Eýropalyq qaıta qurý jáne damý banki qarjysyn jumsaýdy josparlaýda.
«Qyzyljar sý» JShS tehnıkalyq dırektory Arman Saýytovtyń aıtýynsha, basty mindet - shyǵyndardy azaıtyp, jelilerdiń tozýyn 55-60% deıin kishireıtý. Qazir onyń shamamen 80% quraıdy.
Sýmen jabdyqtaý uıymy óz qyzmetteri úshin aldaǵy bes jylda tarıfti kóterýdi josparlap otyr, ázirge ınvestıtsııalyq baǵdarlama ázirlenýde. 2021 jyldyń sońyna qaraı, jeke tulǵalarǵa sý tarıfi 64,5%, káriz júıesi 69%, al zańdyq tulǵalarǵa sáıkesinshe 70% jáne 98% kóterilýi tıis.
SQO Tabıǵı monopolııalardy qorǵaý jáne básekelestikti qorǵaý departamentiniń basshysy Arman Ótegenov mekemeniń zańǵa sáıkes tarıf jobalaryna saraptama júrgizilgendigin, qoǵamdyq tyńdaýlar ótkizilip, sarapshylar keńesi shaqyrylǵan soń sheshim qabyldandanǵanyn aıtty.
2017 jyly soltústikqazaqstandyqtar sý men káriz júıesi úshin 1 tekshe metrine 154,5 teńge tóleıtin bolady. Qazirgi tarıf 142 teńgeni quraıdy.
